Anaa sa maayong kondisyon ang hangin sa Central Visayas taliwa sa hulga sa volcanic sulfur dioxide gas emissions.
Kini maoy gipahibawo sa Environmental Management Bureau (EMB) sa Department of Environment and Natural Resources (DENR) sa Hulyo 11, 2024.
Una na nga nipahibawo ang EMB-Visayas nga duna silay na-monitor nga PM10 ug PM2.5 sa presensya sa kahanginan.
Ang PM10 mga pino nga abog nga duna ray gidak-ong 10 micrometers (0.01 mm) o mas gamay pa sa PM2.5 particles o 2.5 micrometers sa diameter.
Base sa pagsusi sa buhatan sa uwahing air quality status sa Hunyo 10, anaa sa “good quality” o walay nakitang risgo sa hangin nga na-monitor sa Brgy. Masulog, Canlaon City, Negros Oriental.
Nakakuha ang buhatan og 24-hour average nga 10 Particulate Matter (PM10) nga may concentration nga 20 micrograms matag cubic meter ug may kinatibuk-ang equivalent sa Air Quality Index (AQI) nga 18 nga nagpamatuod sa maayong kalidad sa hangin.
Subay sa Air Quality Health Guide sa EMB, anaa sa maayong kondisyon ang hangin sa level nga mogikan sa 0-50 samtang anaa sa moderate levels ang 51-100; unhealthy alang sa mga vulnerable sector ang 101- 200, very unhealthy usab ang kondisyon sa hangin nga dunay equivalent nga 201-300 ug risgo na alang sa hangin nga ang kalidad molapas sa 300.
Lakip sa mga station diin na-monitor ang PM10 sa dakbayan sa Sugbo ug PM2.5 dakbayan sa Toledo ug Mandaue nga nagpakita sa maayong kondisyon sa hangin subay sa equivalent Air Quality Index (AQI) nga anaa sa 4 ug 27 nga anaa sa maayong kondisyon.
Gipasabot sa EMB nga ang PM10 dili lang makuha gumikan sa sulfur dioxide gikan sa bulkan apan lakip sab gikan sa motor vehicles, stationary chimneys ug area construction sources. / ANV
