Gipusil-patay ang usa ka amahan nga nilaban sa iyang anak nga giingong gituok sa gikaaway samtang samdan ang kauban sa iyang anak atol sa hitabo sa Sityo Kabulihan, Barangay Baliang, bukirang dapit sa dakbayan sa Danao, alas 3:50 sa kaadlawon sa Huwebes, Mayo 16, 2024.
Hinuon, nadakpan ang duha ka mga suspek sa hot pursuit operations sa kapulisan.
Ang namatay giila lang sa alyas nga ‘Noel’, 37, drayber sa habalhabal, taga Sitio Langub, Barangay Guinacot, Danao City ug ang angol mao si ‘Jesrel’, 17, taga Purok Tambis, Barangay Togonon, Danao City.
Ang mga biktima gidala sa mga rescue personnel sa Danao City Provincial Hospital, diin si Noel gideklarar nga dead on arrival.
Kapulisan sa Dakbayan sa Danao nihangyo nga pugngan ang mga ngan sa mga biktima ug mga suspek.
Sa pasiunang imbestigasyon sa kapulisan ubos sa pagpangulo ni Lt. Colonel Clark Arriola, si Jesrel ug iyang higala nga si Archie, anak ni Noel, didto sa basketball court sa Sitio Cabulihan, Baliang dihang giduol sila sa duha ka mga lalaking mag-agaw ug gipasanginlan nga sila ang ningtumba sa ilang motorsiklo.
Nihimakak sila sa pasangil.
Si Archie, kinsa nipasangil nga gituok siya sa usa sa mga manag-agaw, nisumbong sa iyang amahan nga si Noel.
Dihang gikomprontase ni Noel ug sa iyang live-in partner ang duha ka mga suspek, usa kanila niibot og armas ug gipusil sa makadaghang mga higayon si Noel sa nagkadaiyang bahin sa lawas.
Naigo usab sa tuong paa si Jesriel, higala ni Archie, dihang gipusil sa iyang suway nga pagsibat.
Duha ka mga suspek nasikop atol sa hot pursuit operations sa kapulisan.
Ang mga suspek gibalhug sa selda samtang nagpaabot sa tukmang mga kaso nga ipasaka batok kanila. / DVG
