Gilupig ni Kevin Durant ang kanhi teammate nga si Stephen Curry ug giduslitan sa Phoenix Suns ang host team Golden State Warriors, 130-105, sa National Basketball Association (NBA) regular season game didto mismo sa California, Pebrero 1 (PH time).
Nangulo sa nagdilaab nga opensa sa Suns si Devin Booker nga mipasidlak og 31 puntos ug 11 assists, samtang si Durant mitunol og 19 puntos para sa dominante nga kadaugan sa Suns.
Nakadawat pud og igong suporta ang Suns sa bench gikan ni Nick Richards nga mipaambit og 14 puntos ug 16 rebounds ug si Bradley Beal nga mihatag og 21 puntos.
Ang superstar sa Warriors nga si Curry nagkalisod pagpangita sa iyang puntos. Unang iskor usa ka short jumper sa 7:38 sa second quarter. Nalimitahan sa Suns si Curry ngadto lang sa 14 puntos sa tibuok duwa.
Ubos pud kaayo ang shooting percentage ni Curry sa three-point area igo lang kini nakapasulod og usa sa iyang unom ka itsa. Sipyat ang unang upat ka tira sa tres, unang tres niini didto na sa fourth quarter.
Ang highest-scorer sa Warriors mao si Moses Moody nga nakabuhat og 17 puntos gikan sa bench.
Samtang didto sa San Antonio, nagmantas ang higante nga si Victor Wembanyama ug gilubong buhi sa San Antonio Spurs ang Milwaukee Bucks, 144-118.
Si Wembanyama nagpabuto og 30 puntos ug 14 rebounds para lupigon ang Bucks, kinsa misandig kang Giannis Antetokounmpo nga dunay 35 puntos ug 13 rebounds.
Mipuno si Keldon Johnson ug 24 puntos ug si Stephon Castle og 20 puntos aron maputol ang San Antonio ilang duha ka sunodsunod nga pildi. / RSC
