Ang 31 anyos nga anak miunay og dunggab sa iyang 55 anyos nga amahan sa dihang wa hatagi sa gipangayo niini nga sigarilyo.
Ang maong insedente nahitabo sa Barangay Masa, Lungsod Dumanjug, Sugbo niadtong Biyernes sa kadlawon, Agusto 16, 2024.
Ang biktima nga si Verlie Llena, gihulagway nga kritikal ang kondisyon human gidunggab ni Jason, minyo, pulos mga mag-uuma.
Gitug-an ni Police Staff Sergeant Junel Luab, imbestigador sa Dumanjug Police Station nga ang suspek nag-antos sa depression.
Nasayran nga tulo na ka gabii nga way tulog si Jason.
“Nasuko man kay wala mahatagi’g sigarilyo sa amahan. Gusto siyang manigarilyo pero gipapahuway aron matulog,” saysay ni PSSgt Luab.
Gikalain ni Jason ang tambag sa iyang amahan nga mopahuway inay nga manigarilyo.
Mikuha og sundang ang suspek nga maoy iyang gihansak ngadto sa iyang amahan sa makadaghang higayon.
Ang biktima gidali sa pagdala sa Barili District Hospital ug gi-refer nga ibalhin sa Vicente Sotto Memorial Medical Center, Dakbayan sa Sugbo.
Samtang ang asawa miingon nga nagsugod ang problema sa panghunahuna ni Jason human kini madisgrasya sa motorsiklo ug dunay mga higayon nga mag-hallucinate ang suspek./ GPL, DVG
