Tindahan nga nahimutang sa Sitio Anagan, Barangay Apas sa Siyudad sa Sugbo ang gitulis sa nagbinugtong nga tulisan, alas 6:04 sa buntag, Biyernes, Oktubre 4, 2024 diin ang maong hitabo nakuha tanan sa gi montar nga CCTV camera.
Human sa hitabo dali nga nagpatabang ang biktima nga si Irish Lorion Abella sa Mabolo Police Station 4 ug mipahibawo nga gitulis sila sa usa ka lalaki nga naka-full face helmet.
Matod sa biktima nga ang suspetsado nagpatuo kini nga mopalit og soft drinks apan sa dihang iyang gitunol kalit lang nga gigunitan ang iyang kamot ug dayong ti-on sa sa armas ug mideklarar nga tulis.
Midemanda ang tulisan nga ihatag ang tulo ka cellular phone nga mobalor ang tanan sa P10,500 ug dali nga misibat sakay sa iyang motorsiklo nga gi-park gawas sa tindahan.
Makita sa CCTV sa tindahan ang pag abot sa suspetsado sakay sa iyang motorsiklo nga naka-sweat shirt nga dunay marka nga “TAKBONG” ug naklaro usab ang panagway niini.
Pagduol niya sa tindahan gisul-ob niya ang iyang full face helmet ug mipalit og ilimnon.
Human maklaro ang panagway sa suspetsado ang kapulisan sa Mabolo milusad og manhunt pinaagi sa pagsubay sa mga kuha sa CCTV camera. Pagka alas 4:30 sa hapon sa maong adlaw nadakpan ang tulisan sa Sityo San Miguel, Barangay Apas.
Giila ang suspek nga si Wilson Ignacio Baguio, 43, usa ka fish vendor, residente sa Sityo Kanaas, Barangay Guadalupe sa dakbayan sa Sugbo.
Nakuha gikan kaniya ang kalibre 38 nga pistola nga dunay mga bala ug mga pinaketeng shabu nga motimbang sa 15 gramos nga dunay standard drug price nga P102,000.00.
Matod ni Police Major Romeo Caacoy Jr nga problema sa pinansyal ang hinungdan nganong nakahukom ang suspek nga manulis.
“Wala daw ni siya ikabayad sa isda, base sa atung assessment sa iyaha nag bisyo ni siya sa illegal drugs nya daghan siyag wala mabayri sa illegal drugs,” matod ni PMajor Caacoy. / AYB
