Nagmantas ang mga beterano nga si Anthony Davis ug LeBron James aron aswaton ang Los Angeles Lakers batok San Antonio Spurs, 120-115, sa National Basketball Association (NBA) Emirates Cup didto sa San Antonio, Texas, kagahapon, Nobiyembre 16, 2024 (PH time).
Ang bigman nga si Davis mipupo og double-double nga 40 puntos ug 12 rebounds, ug si James mipayanog og triple-double nga 15 puntos, 16 rebounds ug 12 assists.
Ang 40 puntos ni Davis mao ang highest-scoring game niya karon nga season, samtang si James nakabuhat og career-high nga upat ka sunodsunod nga triple double.
Miambag sa Lakers duo ang shooter nga si Austin Reaves pinaagi sa 19 puntos, si Dalton Knecht miamot og 14 puntos ug ang guard nga si D’Angelo Russell mitampo og 13 puntos.
Sa habig sa Spurs, nagpadayon sa iyang dominante nga duwa si Victor Wembanyama. Mipakatap kini og 28 puntos, 14 rebounds, lima ka assists ug duha ka blocks.
Niadtong Huwebes, nakahimo og career-high 50 puntos ang 7-foot-4 nga si Wembayama bato Washington Wizards.
Samtang didto sa East side, nakapasulod og tres si Jalen Brunson sa nahabilin nga 6.2 segundos nga maoy miluwas sa New York Knicks kontra Brooklyn Nets, 124-122, sa Madison Square Garden, New York.
Ang Knicks nanginahanglan sa maong game-winning shot human nila mabuhi ang 21 puntos nga labaw.
Gitapos ni Brunson ang duwa nga dunay 37 puntos, mitunol si OG Anunoby og 25 puntos ug si Mikal Bridges mihatag og 22 puntos.
Ang Nets misandig sa season-high 43 puntos ni Cam Thomas. / RSC
