Angkunon og suway sa Meralco Bolts ang solong liderato sa Group A sa ilang pagpakigharong og balik sa Magnolia Chicken Timplados Hotshots sa out-of-town game karong alas 6:00 sa gabii, Sabado, Septiyembre 7, 2024, sa Philippine Basketball Association (PBA) Season 49 Governors’ Cup sa Panabo Multi-Purpose Tourism, Sports and Cultural Center sa Panabo City.
Ang Bolts, nga adunay 4-1 nga rekord, kasamtangang nakigbahin sa TNT Tropang Giga sa liderato sa ilang grupo.
Sa premirong duwa sa duha ka mga kampo, gipangbuntog sa Bolts ang Hotshots, 99-94, niadtong Agusto 18.
Ning higayuna, adunay bag-ong import ang Hotshots nga si Shabazz Muhammad, kinsa maoy gipuli ni Glenn Robinson
Si Muhammad, kinsa gipili sa Minnesota Timberwolves isip 14th overall pick sa 2013 National Basketball Association (NBA) draft, nakaduwa na sa San Miguel Beermen niadtong 2022.
Sa pagpangulo ni Muhammad, malaumon ang Hotshots nga masumpayan ang ilang duha ka sunodsunod nga kadaugan nga maoy nagpainat sa ilang rekord ngadto sa 3-2.
Apan nasayod ang Hotshots nga dili sayon nga tahas ang ilang sagubangon batok sa Bolts, nga pangulohan ni three-time Best Import awardee Allen Durham.
Ubay-ubay man tuod sa pambatong local players sa Bolts ang adunay angol apan maayo gihapon ang dagan sa ilang kampanya gumikan kay nagtambayong ang nahabilin nilang mga sakop aron tapakan ang dakong haw-ang sa ilang puwersa.
Ang local players nga maayong nakaduwa alang sa Bolts mao sila si Chris Banchero, Anjo Caram, Alvin Pasaol ug Jojo Mendoza.
Nagduwa man tuod ang lider sa Bolts nga si Chris Newsome apan tataw nga dili pa 100 percent ang kondisyon niini gikan sa pagkaangol.
Sa ilang bahin, ang Hotshots magsalig sab og maayo nila ni Calvin Abueva, Paul Lee, Ian Sangalang, Jerrick Ahanmisi, ug Zavier Lucero./ ESL
