GIKABALAKA karon sa katawhan sa Kidapawan City ang sunod-sunod nga pagpangawat sa mga motorsiklo sugod adlaw nga Lunes hangtud Sabado, Septyembre 28, 2024.
Moabot na ngadto sa walo ka motor ang gipangkawat sa dakbayan kasagaran mga Suzuki Raider ug Honda XRM.
Gibutyag ni Kidapawan City Chief of Police Lieutenant Colonel Dominador Palgan Jr. nga pinaka-ulahing gikawat ang CRF-150 sa Bartolaba Subdivision, Poblacion, Kidapawan City.
Sagad sa mga motorsiklo nga gikawat giparking lang atbang sa mga balay, mga tindahan ug ubang establisemento.
Giingong naka-locked ang mga motorsiklo, ang uban gikandado pa, apan dunay dala nga master key ang mga kawatan nga gigamit nila sa ilang modus operandi.
Nagtuo si Kidapawan City Mayor Pao Evangelista nga usa ka organisado nga grupo ang mga suspek.
Gipakusgan pa sa Kidapawan City Police Station, uban ang mga force multipliers, sa pagpatrolya sa tibuok dapit sa dakbayan ug gihangyo sab niini ang katawhan nga mabinantayon sa ilang mga motorsiklo batok sa mga motornapper. (EEF)
