Nagpainit na daan ang Magnolia Hotshots kontra NLEX Road Warriors, 99-95, sa wa pa ang ilang giatangan nga Manila Clasico duel sa Barangay Ginebra Gin Kings sa Philippine Basketball Association (PBA) karong adlaw sa Pasko.
Gituhik sa Magnolia ang NLEX, Biyernes sa gabii, didto sa PhilSports Arena aron makakuha og buylo sa di pa nila sagubangon ang dako nga tahas batok Ginebra.
Nanginahanglan og extra period ang Hotshots para makatuhop ang samad sa NLEX ug maputol ang ilang four-game losing sked.
Si Mark Barroca mipasulod sa go-ahead basket 38 segundos ang nabilin sa extra period, nga gisundan sa free throws ni Jerom Lastimosa ug Ricardo Ratliffe nga maoy milansang sa kadaugan.
Misaka ang Magnolia sa 2-4 (win-loss) record samtang ang NLEX natagak sa 3-4 nga baraha.
Misuway pa sa pagdala sa second OT si Robert Bolick ug Rob Herndon sa ilang mga itsa sa four-point line apan puros sila sipyat.
Ang Road Warriors nasugamak sa ikatulong sunodsunod nga pildi.
Taas hinuon og pahuway ang NLEX kay sa Enero 10 pa sila moduwa og balik kontra Meralco Bolts sa Ninoy Aquino Stadium.
Gipangulohan ni Ratliffe ang Magnolia sa iyang 38 puntos ug 19 rebounds, samtang miamot sila Zavier Lucero og 14 puntos, si Lastimosa 13 puntos ug si Barroca 12 puntos.
Si Bolick mipakatap og 28 puntos, mitunol si Herndon og 18, si Mike Watkins miamot og 17 ug si Kevin Alas mihatag og 11 sa Road Warriors.
Puntos matag-usa:
Magnolia 99 – Ratliffe 38, Lucero 14, Lastimosa 13, Barroca 12, Balanza 6, Abueva 6, Mendoza 3, Dionisio 3, Dela Rosa 2, Sangalang 2.
NLEX 95 – Bolick 28, Herndon 18, Watkins 17, Alas 11, Torres 8, Mocon 6, Semerad 5, Policarpio 2. / RSC
