Gikataho nga drug pusher ang namatay sa dihang nakigpinusilay sa kapulisan sa ala 1:50 sa kaadlawon, Miyerkules, Nobiyembre 13, 2024, Sityo Sawsawan, Barangay San Roque, Dakbayan sa Talisay.
Usa ka gihinganla’g Romel, hingkod, nagpuyo sa nahisgutang lugar ang namatay atol sa maong engkuwentro.
Si Police Lt. Col. Epream Paguyod, hepe sa Talisay Police Station nga nahinabi sa GMA DYSS Super Radio nagkanayon nga nakadawat sila og report kabahin sa ilegal nga kalihukan sa suspek hinungdan nga gimonitor.
Pag-abot sa iyang mga sakop kalit lang nga namusil ang maong subject nga miresulta sa sinukliay sa bala sa dihang midepensa ang mga polis.
Nakaangkon og mga samad pinusilan sa nagkadaiyang bahin sa iyang lawas si Romel ug gidala sa Cebu South Medical Center apan gideklarar sa mga doktor nga dead on arrival (DOA).
Nakuha gikan sa crime scene ang usa ka revolver nga adunay tulo ka mga bala, usa ka kabhang, duha ka cartridge nga napabuto, ug drugas nga motimbang og 2.4 gramos nga gibanabana nga mobalor ngadto sa P16,320.
Gibutyag ni Paguyod nga base sa ilang nakuha nga inpormasyon, ang suspek migamit og mga bata sa pagbaligya sa drugas.
Ang maong mga bata nagpangedaron pa lang og 9 ngadto sa 15 anyos nga nagsilbing courrier sa illegal nga drugas. Ang mga menor dunay madawat nga 10 porsyento matag transaksiyon. / GPL
