KASONG murder ug duha ka kasong frustrated murder ang atubangon sa usa ka pulis human namusil-patay og pasahero sa bus samtang gabiyahe sa Barangay Batasan, Makilala, North Cotabato, alas 2:30 sa kaadlawon, Disyembre 28, 2024, ug miangol sa laing duha ka mga pulis sa checkpoint.
Subay sa police report, ang suspek nga si PCpl Alfred Dawatan Sabas nga nadestino sa General Santos City, sakay sa Mindanao Star bus gikan GenSan, kauban ang iyang asawa, gikataho nga hubog ug namusil punting sa ulo sa biktimang si Reynaldo (bansagon gitago), taga-Batasan, Makilala, usa ka security guard.
Human sa insidente sa pagpamusil, gimandoan matud pa sa suspek ang bus nga modiretso sa pagbiyahe ug pag-abot sa checkpoint sa 1104th RMFB 11 border control point sa New Opon, Magsaysay, Davao del Sur , nagsugilon sumala pa ang pulis nga ginasundan sila og van. Tungod niini, gimandoan sa duty police officer ang iyang mga sakop nga magbantay sa giingong van. Apan sa kalit lamang, ang suspetsado, namusil sa duha ka mga kabaro nga naigo sa nagkadaiyang bahin sa ilang lawas.
Ang mga naangol nga pulis gidala sa balay tambalanan nga giilang sila PCpl Kenth Maurith Ramos ug Pat. Russel Love Tapia. Ang suspek misibat sa wala matino nga direksiyon kauban ang iyang asawa.
Tungod niini, ang Magsaysay Municipal Police Station, uban ang mga personahe sa 1104th RMFB 11 ug 1203rd RMFB12, milusad og hot pursuit operation ug malampusong nadakpan ang suspek, kauban ang iyang partner sa New Opon. Nabawi kaniya ang usa ka caliber 9mm Canik nga may tulo ka magazine nga may 37 ka mga buhing bala ug ubang mga gamit.
Sa pikas bahin, human masignit si Sabas, nag-abot ang mga opisyal sa kapulisan sa Region XI ug Region XII aron magtambayayong sa imbestigasyon tungod kay nahitabo ang mga krimen sa duha ka managlahing rehiyon ug jurisdiction. Nasabutan sa mga opisyal nga pasakahan og kasong murder sa Makilala Municipal Police Station si Sabas samtang ang mosang-at sa 2 counts sa Frustrated Murder mao ang Magsaysay MPS sa Magsaysay, Davao del Sur. (July Aubrey R. Ngo)
