Nawalis ang aping sa 38 anyos nga lalaki human nga gitigbas sa iyang kapuyo nga matod pa hubog niadtong higayona gumikan sa kapungot sa dihang wa patan-awa sa payslip sa biktima.
Ang insidente nahitabo niadtong alas 8:00 sa gabii, Biyernes, Disyembre 20, 2024 sud sa ilang gipuy-an sa Barangay Apas, Cebu City.
Ang biktima midangop sa Mabolo Police Station 4 nga nagkadugo ang wala nga bahin sa iyang aping nga binuhatan sa iyang kapuyo. Identity sa duruha kasamtagan nga gipugngan.
Asoy sa biktima nga naligo siya niadtong tungora nga miabot ang iyang kapuyo nga gihulagway nga hubog ug gisigehan siya og pangayo sa iyang payslip, kay buot niini tan-awon og pila gyud ang iyang kinatibuk-ang madawat nga suweldo.
Nagduda ang suspek kay matod pa gamay nalay mahibilin sa sweldo.
Apan wa makapakita ang biktima hinungdan nga gitigbas gamit ang ilang sundang, maayo nalang dili grabe ug igo lang nakuhitan ang iyang wala nga bahin sa aping.
Dugang pa sa biktima nga sa higayon nga mahubog ang iyang kapuyo magwala kini ug sa higayon nga iyang badlungon siguradong madapatan siya niini.
Ang biktima nakahukom nga mopasaka og reklamo batok sa iyang kapuyo og physical injury. /
