GUMIKAN na sab sa tabang sa komunidad, natala sa Davao City Police Office (DCPO) ang dul-an P3 milyones nga kantidad sa gituohang ilegal nga druga gikan sa peryod nga Nobyembre 10, 2024 padung sa Nobyembre 16, 2024.
Subay sa datus gikan sa DCPO, ang nasampit nga kalampusan naglangkob sa 29 ka mga anti-illegal drug operations diin malampusong nadakpan ang 37 ka mga indibiduwal.
Ang mga nakumpiska nga gituohang shabu motimbang sa 432.59 gramos nga dunay market value nga P2,941,612, samtang ang pinaugang dahon sa marijuana anaa sa 153.021 gramos nga dunay market value nga P18,362.52.
Ubos sa pagdumala ni Acting City Director Hansel Marantan dali nga napatuman ang “4 directives” target operation sa kapulisan ngadto sa komunidad.
Gawas sa ilegal nga druga, gipakusgan sab sa DCPO ang anti-gambling campaign nga midakop sa sugarol sa usa ka operasyon.
Anaa sab sa 35 operations ang natigayon diin malampusong nadakpan ang 42 ka nga tawo diin napulo niini mga most wanted persons, uban sa 25 ka mga wanted individuals ug laing 35 ka mga tawo.
Pinaagi sa upat ka target nga operasyon, nasikop sa DCPO ang tulo ka indibiduwal ug nasakmit ang tulo ka illegal nga armas. Dugang pa, duha pa ubos sa misurender nga mga armas ug three ka kaso nga gipasaka sa korte.
Sa kinatibuk-an, nasikop sa DCPO ang 76 ka mga indibiduwal diin sa karon ang DCPO nagpakita sa ilang pasalig sa pagwagtang sa mga ilegal nga kalihokan sa siyudad.
Kini nga mga nahimo nagpasiugda sa dedikasyon sa DCPO sa pagpatuman sa balaod samtang nagtahod sa tawhanong katungod ug nagsunod sa Police Operational Procedures.
Ang DCPO nagpaabot usab sa ilang pasalamat ngadto sa mga opisyal sa barangay, mga miyembro sa komunidad, ug sa local government unit sa ilang padayon nga suporta, nga nahimong bililhon sa kalampusan niini nga mga operasyon. (Jeepy P. Compio)
