GIPAKLARO sa Davao City Police Office (DCPO) nga ang suspek nga nipatay sa iyang kaugalingong amahan niadtong Pebrero 4, 2025 sa Purok Tisa, Barangay Talandang, Tugbok District di na ipailawom sa drug test human nga kasong “parricide” gipasaka sa buhatan sa Prosecutor niadtong Pebrero 5, 2025.
Ang suspek giila nga si Raymond Itang Dasig, 26-anyos, samtang ang biktima mao si Rolando Makiling Dasig, 60-anyos, pulos mga laborers.
Sa paghinabi uban ni Police Major Noe Macolbacol Jr., Deputy Station Commander for Administration sa Los Amigos, sa dxDC RMN Davao, gikompirma sa opisyal nga ang pagkalambigit sa suspek sa pagpanigbas bag-ohay way kalambigitan sa illegal nga druga, busa wala na’y drug test ang himuon.
Gi-esplikar ni Macolbacol nga una napasaka ang kaso, ang suspek nipailawom og medical examination tungod sa mga samad sa iyang lawas.
Sumala sa mga awtoridad, gitaho nga ang amahan ug anak namauli sa balay gikan sa pagsaulog og adlaw nga natawhan sa silingan.
Nihunong sila sa laing panimalay sa lain anak sa biktima nga si Richard Dasig.
Apan kalit lang nakabati si Elizabeth Dasig Bugais, silingan, og kasaba gikan sa sulod sa balay ni Richard, mora og nagkalalis.
Sa dihang nigawas siya aron susihon, iyang nakita si Raymond nga nigawas sa balay nga dunay mga dugo.
Iyang gisulti nga, “Wala na. Akoa ng gitigbas si papa kay giunhan man ko niya.”
Mga saksi, apil ang 14-anyos nga apo, nagsulti nga ang suspek nag-unay og tigbas sa iyang kaugalingong abaga aron nga pasanginlan ang amahan nga maoy naghimo niini.
Apan mga imbestigador nadetermina nga niini nga tinuyo.
Ang amahan nakaplagan nga samdan ug gidali pagdala ngadto sa Southern Philippines Medical Center (SPMC), kon diin gideklara kining dead on arrival.
Gikontak sa SunStar Davao ang police station kagahapon, Biyernes, Pebrero 7, 2025, aron nga mangutana bahin sa katikaran sa kaso ug kung ang suspek ba nipailawom og psychological evaluation, apan wala makadawat pa og tubag. (David Ezra Francisquete)
