WALA damha sa magtiayon nga nitabok sa dalan nga mao na kadto ang katapusan nilang panag-uban human usa kanila ang mitaliwan dihang nabanggaan ug naligsan ang usa kanila sa duha ka mga naghaguros nga sakyanan sa Purok Manggahan, Barangay Sinawilan, Matanao, Davao del Sur, gabii sa Nobyembre 10, 2024. Ang duha ka mga sakyanan, gikabutyag nga misibat human sa insidente.
Sumala sa police report, giila ang biktima nga si Felix (bansagon gitago), 39-anyos, construction worker, taga Bansalan, Davao del Sur. Dugang pa nga nianang gabhiona, namalit lang ang biktima og balut kauban ang iyang asawa ug motabok na unta sa karsada dihang kalit nabanggaan sa naghaguros nga Toyota pickup.
Sa kakusog sa impak sa bangga, nalagpot ang biktima sa pikas nga linya sa kalsada ug naligsan na sab sa dihang naabtan sa laing pickup nga gikan og Bansalan paingon og Digos.
Giingong gisuwayan pa sa pagdala sa Viacrusis Hospital sa Bansalan si Felix apan gideklara siya nga dead-on-arrival tungod sa di tiaw nga bun-og ug samad nga nahiaguman sa maong disgrasya.
Sumala pa sa taho nga pulos misibat sa lugar sa insidente ang duha ka mga sakyanan nga nalambigit sa aksidente.
Ang unang behikulo nga nibangga sa biktima padayong gipangita sa kapulisan samtang ang ikaduhang pickup giingong napalgan nga gi-abandona sa Barangay Dolo sa Bansalan ug gisuta pa ang drayber ug nanag-iya niini. (July Aubrey R. Ngo)
