Diriyot mabuwag sa iyang lawas ang ulo sa mangulingay human gitadtad sa iya ra sab nga silingan nga iyang gipaningil sa balanse sa P12,000 nga bayrunon gumikan sa kamatayon sa iyang kabayo, ug ang suspek maoy gitumbok nga responsable sa pagkamatay sa maong binuhi.
Ang linuog nga krimen nahitabo sa alas 7:45 sa gabii, Biyernes, Oktubre 25, 2024 sa Sitio Avocado, Barangay Macas, Lungsod sa Catmon, Cebu.
Ang biktima giila nga si Jemelito Pontejon, 46, residente sa maong dapit, samtang ang suspek mao si Felix Abajo, 66, silingan.
Base sa nahipos nga inpormasyon sa Catmon Police Station nga ang biktima ug suspek nag-abot sa ilang gipamistahan sa Barangay Macas, ug nag-inom.
Atol sa ilang panagtagay giingong gibalikbalik og hisgot ni Pontejon ang pagkamatay sa iyang binuhing kabayo niadtong buwan sa Septiyembre.
Mipasingil si Pontejon nga si Abajo maoy gipasanginlan nga mipatay sa iyang kabayo nga iyang gipabayad og P12,000, apan nakahatag na sa katunga sa kantidad ang suspek.
Giingong nagsige og balikbalik sa pagpaningil ni Pontejon ang suspek sa iyang utang bisan nga matod pa mipasabot nga di pa siya makabayad tungod kay wa pa siya’y kuwarta.
Mitumaw ang mainitong panaglalis tali sa duruha hangtod nga nagkarambola atol nga adunay sundang sa iyang posisyon ang suspek nga iyang gihapos sa biktima.
Diriyot maputol ang wala nga pulso sa ni Pontejon sa iyang pagpanagang, tungod niini nahagba ang biktima nga giingong mihangyo nga dili siya tiwasan.
Apan sa naputos sa kalagot ang suspek ug gilahos niya sa pagtigbas ang biktima tumong sa iyang tangkugo nga miresulta sa hinanaling kamatayon.
Nasuta nga makadaghan nang nabilanggo si Abajo sa Mindanao ug sa Sugbo sa kasong pagpatay.
Nasikop ra sab gilayon ang suspek sa kapulisan atol sa hot pursuit ug kasong murder ang ipasaka batok sa dinakpan. / Uban sa taho ni GPL
