Gidakop ug gibalhong sa selda sa Guadalupe Police Station ang usa ka waiter human gireklamo sa nangumot og dughan ug mihinol sa kinatawo sa babaye sa Barangay Guadalupe, dakbayan sa Sugbo, alas 4:00 sa kaadlawon, Biyernes, Disyembre 6, 2024.
Ang dinakpan giila sa kapulisan sa alyas nga ‘AJ’, 29, dunay kapuyo, ug taga Sitio Kamanggahan, Brgy. Guadalupe, kinsa nag-atubang og kasong acts of lasciviousness.
Samtang, ang biktitma mao si alyas ‘Maris’, 29, taga Brgy. Guadalupe, nga nagdumuli sa pagtubag sa mga sakop sa media sanglit dili siya gustong madaot sa iyang trabaho.
Ang biktima nangayo og panabang sa kapulisan human giingong gibinastosan sa suspek samtàng ang ulahi naipon sa iyang grupo nga nag-inom.
Apan si AJ nga nahinabi sa Superbalita Cebu hugtanong nihimakak sa mga pasangil nga gihikap niya ang kinatawo sa biktima.
Matod niini nga aksidenti lang nga nahikapan niya ang dughan sa biktima kay langas na sila tungod sa kahubog.
Ug sa ilang kalangas, dason ni AJ, aksidenting nasaghiran ang dughan apan wala sab siya nanghikap sa bugan kay igo lang niyang gikuptan sa paa samtang iyang gitagyan.
“Bunga ra gyud to sa among kahubog ba. Sa paghagwahagwa nahikapan nako wala matuyo,” matod ni AJ.
Hinuon, nangayo siya og pasaylo sa biktima.
Dugang asoy ni AJ, gikan siya nagtagay sa iyang trabahoan ug nihapit sa laing imnanan uban sa mga barkada.
Samtang, ang biktima nagtagay sab kini uban sa mga higala tupad sa ilang lamesa hangtod nga sila nagkauban na sa inom.
Matod ni AJ, ang iyang nagustuhan mao ang kauban sa biktima nga tambukon apan dihang nahibaw-an niya nga minyo, nibalhin siya sa pikas lingkuranan duol sa biktima.
Dugang niya, naghagwahagwa sial ni Maris ug wa siya magtuo nga moreklamo kini sa kapulisan./GPL
