Laing drug den ang gibungkag sa Philippine Drug Enforcement Agency (PDEA) 7 uban sa Labangon Police Station 10 sa Cebu City Police Office (CCPO) sa Sitio Sto. Roasario, Barangay Labangon, Dakbayan sa Sugbo, alas 8:50 sa gabii, Miyerkules, Enero 8, 2025, nga niresulta sa pagkasikop sa tulo ka mga suspek.
Nadakpan sa mga operatiba ang nagpadagan sa drug den nga si alyas Harry, 33, usa ka construction painter, molupyo sa maong lugar.
Lakip sa napusasan human naabtan sulod sa drug den mao silang alyas Renante, 29, taga Labangon, ug Alyas Joseph, 42, negosyante og buy and sell og piyesa sa sakyanan taga Ipil, Zamboanga Sibugay.
Nasakmit sa mga operatiba sa PDEA 7 ang pito ka putos sa gituohang shabu nga motimbang sa 11 gramos nga dunay estimated average market value nga P74,800 ug nagkadaiyang drug paraphernalia.
Matod ni Leia Alcantara, information officer sa PDEA 7, nga duha ka semana nila nga gipaubos sa case buildup ang suspek nga si alyas Harry human madawat ang inpormasyon gikan sa usa ka concerned citizen sa dapit.
Sa nakuha nga kasayuran makabaligya siya og 20 gramos nga shabu matag semana ug bag-o lang sa maong matang sa ilegal nga negosyo ang suspek.
Samtang, nadakpan usab sa Waterfront Police Station 3 sa CCPO ang usa ka construction worker sa gilusad nga buy-bust sa alas 10:00 sa gabii sa susamang petsa sa Sitio Lomboy, Barangay San Roque, Dakbayan sa Sugbo.
Ang nasikop giila nga si Earl John Tupas, alyas Dan-Dan, 21, molupyo sa Sitio Susco, Barangay Guadalupe.
Nakuha sa kapulisan ang mga putos sa gituohang shabu nga motimbang sa 5 gramos nga dunay standard drug price nga P34,000.
Ang mga sakop sa drug den sa Labangon ug nasikop sa Waterfront Police Station gikatakda nga pasakaan og tukmang kaso. / AYB
