Naagak ni Austin Reaves sa kulbahinam nga daog ang Los Angeles Lakes batok sa hosts Golden State Warriors, 115-113, pinaagi sa iyang layup sa nahabiling usa ka segundo niadtong Huwebes, Disyembre 26, 2024 (Pasko sa US), sa National Basketball Association (NBA).
Sa nahabiling pito ka mga segundos, nialisngaw na unta ang overtime dihang natabla ni Warriors superstar Stephen Curry ang duwa, 113-113, pinaagi sa iyang three-pointer.
Gikan sa timeout, ang Lakers naghan-ay og set play alang unta ni LeBron James apan wala kini nahitabo gumikan kay hugot ang depensa sa Warriors ngadto sa four-time MVP.
Tungod niini, ang Lakers naahat sa pagpangita og laing opsyon ug si Reaves maoy napiyalan sa pag-itsa sa nakapadaog nga puntos.
“It got to a hand that we trust,” matod ni James. “The play was drawn up for me, they doubled me at the top of the key. It’s always great to have great options out on the floor at the same time. AR’s been in that position before.”
Gipangulohan ni James ang Lakers pinaagi sa iyang 31 puntos samtang nidugang si Reaves og triple-double nga 26 puntos, 10 rebounds, ug 10 assists, nga igo na aron tapakan ang haw-ang nga nabiyaan ni Anthony Davis.
Sa 1st quarter pa lang, naangol (sprained left ankle) si Davis ug wala na nabalik sa pagduwa.
“It’s always difficult to play without AD, so I guess our job is even more heightened, we have to do a little bit more,” dugang ni James.
“Everyone has to chip in, especially on the defensive end because AD is our anchor.”
Ang Warriors gipangulohan ni Curry pinaagi sa iyang 38 puntos lakip na niini ang walo ka three-pointers samtang niamot og 21 puntos si Andrew Wiggins.
Puntos kada usa:
LA Lakers (115) – James 31, Reaves 26, Hachimura 18, Christie 16, Knecht 13, Vincent 5, Reddish 4, Koloko 2.
Golden State (113) – Curry 38, Wiggins 21, Kuminga 14, Schroder 11, Jackson-Davis 11, Podziemski 6, Hield 5, Payton II 4. / AP
