Usa ka lokal nga kontak sa mga dayo nga nitulis sa duha ka mga jewelry store sa dan Calderon, Barangay Ermita, dakbayan sa Sugbo ang nasikop sa buy-bust sa mga sakop sa Carbon Police Station, alas 4:00 sa hapon, Domingdo, Disyembre 15, 2024, sa Sitio Bato, Ermita.
Ang suspek giila nga si Sherah Llegunas Albina, 37, molupyo sa Sitio Bahabaha, Barangay Poblacion, lungsod sa Argao.
Nakuha gikan sa suspek ang upat ka mga pakete sa gituohang shabu nga motimbang sa 10 gramos nga dunay standard drug price nga P68,000.
Lakip sa nakuha sa mga operatiba ang usa ka kwentas nga bulawan ug mga resibo nga gibutang sa iyang itom nga coin purse.
Matod ni Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nga si Albina konsabo sa dungan nga pagtulis sa DGC D’ Gold Chain Jewelry Store ug Macy Gold and Silver sa Ermita, alas 11 sa buntang niadtong Agusto 8, 2024, diin gibanabana nga moabot sa P10 milyunes nga balor sa mga alahas ang nakuha sa mga tulisan.
Dugang ni Macatangay nga nakuha sa mga polis ang mga resibo diin daghang alahas ang iyang gipangbaligya sa naglainlaing lugar sa Sugbo.
Atol sa gihimong inventory sa mga imbestigador sa CCPO uban sa mga kawani sa duha ka jewelry stores, gipang-ila nila ang pipila ka mga alahas nga ilaha nga nadala sa mga tulisan ug nabaligya ni Albina.
“Isa na sa ongoing nga inventory sa kapulisan sa atung mga investigator, initial nga pagpakisayod nato ang uban sa mga items were initially identified already nga as part of those nga nakuha ani nga maong pawnshops,” matod ni Macatangay.
Wala motug-an si Macatangay kung pila ka mga alahas ang gi-dispose sa suspek base sa nakuha nila nga mga resibo sa alahas.
Wala si Albina makita sa nahitabong tulis, apan matod ni Macatangay, kini maoy gitudlo nga naghatag sa usa sa mga motorsiklo nga gigamit sa mga tulisan pag-ikyas human nila matulis ang duha ka pawnshops.
Nagpadayon pa hinuon ang gihimong imbestigasyon sa kapulisan sa dakbayan sa Sugbo sa maong suspek ilabi na sa naghatag sa impormasyon nga maoy hinungdan nga malampuson sila sa pagdakop niini.
Nipasabot si Macatangay nga si Albina lakip sa grupo nga nag lano sa pagtulis sa mga establisamento sa dakbayan sa Sugbo.
Kalapasan sa Section 11, Article II, Republic ACT 9165 o Comprehensive Dangerous Drugs Act of 2002 ang kasamtangan nga ipasaka nga kaso sa Carbon Police Station batok sa suspek.
Apan isunod usab ang kasong robbery kung makompleto na sa kapulisan ang ilang mga ebidensya.
Samtang, ang maong kaso sa pagpanulis sa dayag nga adlaw nag-aghat sa pagsusi og balik sa security proctocol sa mga estabilisemento ug pag-review sa lokal nga balaudnon alang sa hugot nga pagpatuman sa mga lagda alang sa seguridad./
