Wala mahinayon ang pag-arraign sa piskalya sa radio blocktimer Roger Cimafranca ug sa iyang kauban nga reporter nga na-entrap sa mga sakop sa Criminal Investigation and Detection Group (CIDG) – Cebu City Field Unit niadtong Huwebes, Nobiyembre 28, 2024 sa sulod sa usa ka coffee shop sa usa ka mall sa Barangay Lawaan 2, sa siyudad sa Talisay.
Tungod niini, magpabilin pa sa sulod sa temporary custodial facility sa CIDG 7 si Roger Cimafranca ug ang iyang kaubang reporter nga si Joselito Dullano.
Usa ka personnel sa CIDG-7 nibutyag nga ila pa nga giandam ang tanang dokumento una nila ipasaka ang kasong Robbery Extortion sa piskalya sa dakbayan sa Talisay.
Gitakda unta nga ipasaka ang kaso sa CIDG 7 batok sa duha sa Biyernes, Nobiyembre 29, 2024 apan ilang giuswsag sa Lunes, Disyembre 2, 2024.
Si Cimafranca, sa iyang bahin, gusto na unta nga ma-file na ang kaso aron makapyansa na siya ug mobalik na sa naandan nga trabaho.
Matod ni Cimafranca nga andam niya nga atubangon sa korte ang kaso nga gipasaka kaniya sanglit, matod pa niya, inosente siya ug usa lang kini ka pagpamulitika gumikan kay nikandidato man siya pagka mayor sa Talisay.
Una na nga nireklamo si Talisay City Mayor Gerald Anthony Samsam Gullas sa CIDG 7 human matod pa mi text si Cimafranca nga andam kini nga mo atras sa pagdagan pagka mayor sa Talisay City kung bayran siya niini ug P4 Milyunes.
Apan gipaubsan niya kini ngadto sa P2 Milyunes ug kung dili mosanong sa iyang gusto iyang iyagyag sa iyang programa sa radio ang mga hiwing binuhatan sa mayor.
PAG-ENTRAP
Gipasabot ni Gullas ang mga sirkumstansya hinungdan sa pagkasikop sa magsisibya nga si Cimafranca.
Matod niya nga sa sayo pa nakadawat siya og text message nga pinetsahan og Nobiyembre 2, 5, ug 6, 2024, nga naghangyo kaniya nga mobayad og P4 milyones ug i-withdraw ni Cimafranca ang iyang kandidatura.
“Ang ako ra gyud lainan man gud kay dili gyud nato himoon og binuang ang electoral process. Importante kaayo ang demokrasya pero og abusohon nato, diha na tingali mo react ang usa ka tawo,” matod ni Gullas
Si Gullas ug ang iyang grupo nisugod og pakig-estorya sa nagpadala sa mensahe hangtod nga usa sa iyang mga staff nakigtagbo kang Cimafranca sulod sa usa ka coffee shop.
Si Cimafranca nikompirmar sa mga kawani sa mayor nga siya ang nagpadala sa text message.
Iyang gimandoan ang iyang mga kawani nga di siya mobayad kay supak kini sa balaod ug demokrasya sa proseso sa piniliay.
“Human niingon mana siya nga daghan kaayo ko og ipagawas sa radiyo (bahin) ni Samsam, daghan ko og isyu ilabay kaniya. Iyahang pagkakusog moinom, barkada. Dayon niingon siya nga P2 million og okay nako.. ug mo-withdraw nako,” matod ni Gullas.
Ang iyang mga kawani mibiya sa tigom hinungdan nga niduso siya og report atubangan sa CIDG. / AYB, EHP
