DAVAO DEL NORTE — Kasong parricide ang ipasaka nga kaso sa anak kinsa miunay pagpatay sa iyang amahan pinaagi sa paggulgol sa ulo niini sa Purok 1A- Gapas, Barangay Madaum, Siyudad sa Tagum, Lunes, Enero 19, 2025.
Nasayran nga ang suspek nga nailang si alyas Balono, naaresto sa mga pulis alas 8:10 sa buntag niadtong Lunes human nga maoy gitudlong nigulgol sa ulo sa iyang amahan sulod sa ilang panimalay sa maong dapit.
Subay sa report sa Investigation and detective Management Section sa Tagum City Police Station, nasayran nga ang maong buhatan nakadawat og taho kabahin sa insidente sa nahisgutang dapit hinungdan nga gilayon nila kining girespondihan ug sa pag-abot sa dapit, giingong nakurat ang mga pulis dihang maoy napalgan ang patay’ng lawas sa biktima nga wala na’y ulo ug ang mga lamang loob niini nanglugwa na gikan sa nabuslot niyang tiyan.
Napalgan sab sa mga pulis ang karahay nga giingong adunay sulod nga mga laman loob sa biktima, ingon man mga buak-buak nga mga bildo.
Usa sa mga testigo nagbutyag nga alas 6:30 sa buntag sa maong adlaw, nakadungog siya’g komosyon gikan sa panimalay sa biktima ug wa madugay nakita niya ang suspek nga migawas nga nagbitbit og hinagiban ug miatake paduol kaniya hinungdan nga nikaratil og dagan ug nangayo’g tabang ngadto sa mga miyembro sa Salaam Police sa dapit hinungdan nga naaresto ang suspek .
Nakuha gikan sa crime scene ang sundang, lagaraw, martilyo, pala ug ang usa ka dakong sanga sa kahoy.
Dugang sa imbestigasyon, nasayran nga ang suspek aduna matud pa’y sakit sa pangisip.
Sa paghagpat ning balita, padayon pang gipangita ang ulo sa biktima nga gitagod- tagod sa suspek sanglit ang utok ug ang dalunggan sa biktima mao pa lamang ang napalgan.
Ang suspek gikustodiya sa Tagum City Police Station. (Dexter T. Visitacion)
