Nagdilaab nga kayo maoy nisugat sa sayong kabuntagon sa mga residente sa Sityo Bugnay 2, Barangay Labangon, Dakbayan sa Sugbo, alas 6:35, kagahapon, Sabado, Agusto 17, 2024.
Sa inisyal nga imbestigasyon sa Bureau of Fire Cebu City, pinaagi ni F03 Fulbert Navarro nga ang kayo giingong nagsugod sa balay sa usa ka Arlinda Pamugas nga mikanit ngadto sa laing 29 ka mga kabalayan.
Moabot ngadto sa 45 ka pamilya nga gilangkuban sa 180 ka mga tawo ang apektado sa maong sunog.
Samtang adunay usa ka lalaki ang gipugngan karon nga gidudahang may kalabutan sa maong hitabo.
Gikataho nga ang mga silingan mipasangil nga ang gihinganlan nga Michael ang gikustodiya sa kapulisan, naila sa ilang dapit nga nalambigit sa illegal drugs ang gidudahan maoy nagsugod sa kayo.
Apan hugtanong mihimikak si Michael, gani mitabang pa siya sa ilang lugar nga dili mokatap pa ang maong kayo ngadto sa mga kasikbit nga mga balay.
Kapin sa usa ka oras ang maong sunog ug miabot ngadto sa gibanabana kapin sa P1.3 milyones ang danyos sa maong hitabo. / DVG
