Kanhi sakop sa Philippine National Police (PNP) ug duha ka barangay workers ang apil sa pagkasikop sa gilusad nga buy-bust sa Philippine Drug Enforcement Agency (PDEA) 7 ug kapulisan sa Dakbayan sa Sugbo, Miyerkules, Enero 15, 2025, sa Barangay Duljo-Fatima, Cebu City.
Subject sa operasyon ang ex-police nga si alyas Ruel, 58, nga nagranggo og Police Staff Sergeant.
Si Ruel gikatahong nagdumala og drug den sa dihang wala na sa serbisyo sa kapulisan human nga gideklarar nga absent without official leave (AWOL).
Samtang apil nga nadakpan sila si alyas Cosme, 61, on call driver, taga Samboan, ug alyas Seighbrey, 46, parking boy, taga Barangay Santo Niño, Siyudad sa Sugbo.
Nakuha sa mga operatiba ang pito ka pakete sa gituohang shabu nga motimbang sa 18 grams nga mobalor ngadto sa P122,400 lakip na ang buy-bust money, cellphone ug drug paraphernalia.
Ang mga ebidensya gi-turnover sa repository sa PDEA 7 Regional Office Laboratory alang sa chemical analysis.
Matod ni Leia Alcantara, information officer sa PDEA 7 nga base sa ilang monitoring, nag-AWOL ang maong kanhi polis niadtong 2004 human matod pa nadaot sa gugma sa dihang giingong nagbinuang ang asawa niini hinungdan nga wala na ganahi og balik sa iyang serbisyo. Tungod kay wala nay trabaho giingong gisudlan ang negusyo sa drugas ug nagpadagan og drug den sa maong lugar.
Napriso na niadtong 2016 si Ruel sa kasong illegal drugs apan na-dismiss ang kaso niadtong 2022 ug nibalik siya sa naandan nga negosyo.
Usa ka semana nga gipaubos sa case build-up sa PDEA 7 ang drug den human madawat ang inpormasyon gikan sa concerned citizen.
Giingong makabaligya si Ruel og 10 ngadto sa 50 gramos nga shabu matag semana.
LAING RONDA
Samtang, laing drug den ang gironda sa alas 11:02 sa buntag, Miyerkules, Enero 15, sa hiniusang puwersa sa PDEA Negros Oriental Provincial Office ug PNP Regional Intelligence Unit 7, PNP Drug Enforcement Group ug Dumaguete Drug Enforcement Unit sa Purok Israel Barangay Daro Dakbayan sa Dumaguete, Negros Oriental.
Ang maong operasyon niresulta sa pagkasikop sa lima ka tawo.
Ang mga nadakpan giila nga silang alyas Dante, 50, construction painter, maoy target sa operation nga nagpadagan sa drug den ug ang upat nga naatlan nga silang alyas Reynel, 53, Barangay hall messenger; alyas Virgilio, 46, Barangay Tanod; alyas Wilmar, 39; ug alyas Carmelito, 45, pulos traysikol drayber.
Nasakmit sa mga operatiba ang walo ka pakete sa gituohang shabu nga motimbang sa unom ka gramos nga dunay estimated average market value nga P40,800 lakip na ang buy-bust money ug mga drug paraphernalia. /
