Kanhi konsehal sa Barangay Pamutan bukirang dapit sa dakbayan sa Sugbo ang gisikop sa Criminal Investigation and Detection Group (CIDG-7) human nalutsan og warrant of arrest sa kasong estafa alas 3 sa Lunes sa hapon, Agusto 12, 2024.
Ang nadakpan giila nga si Cristy Gomez Labitad, hingkod ang pangidaron, nagpuyo sa maong barangay. Ang CIDG 7 adunay warrant of arrest nga giluwatan ni Judge Charina Quijano, Presiding Judge sa Branch 2 sa MTCC sa dakbayan sa Talisay sa kasong estafa.
Matod sa arresting officer nga si Police Chief Master Sergeant Ronie Nodalo nga si Labitad giingong nagpasiugda og paluwagan nga gitawag niya og CDL.
Apan wala na kini makabayad sa mikuha og paluwagan ug adunay usa niini ang naka-invest na og P1.2 milyones. Human nga wala na makahatag si Labitad gikiha siya sa korte ug nalutsan sa warrant of arrest.
Gipaabot sa CIDG 7 nga aduna pay dugang modangop sa ilang buhatan nga nabiktima ni Labitad.
Kasamtangan nga gi kustodiya sa CIDG 7 custodial facility ang maong akusado ug gipresenter na sa korte. / AYB
