GITUTUKAN sa bag-o lang natapos nga Regionwide Barangay Information Officers Network (BION) Assembly sa Koronadal City ang pakigbatok sa fake news.
Ang maong panagtapok nga gitambongan sa kapin 500 ka mga Barangay Information Officers (BIOs) sa rehiyon maoy labing una sa tibuok nasud ug gipangunahan sa Philippine Information Agency (PIA).
Gitataw ni PIA Deputy General Adolfo Ares Gutierrez nga ang fake news usa ka dakong hagit nga giatubang sa mga information officers ug unsaon kini pagsumpo.
Nagpasalamat si Koronadal Mayor Eliordo Ogena sa PIA sa pag-organisa sa nasangpit nga kalihokan.
Gipursige ni Ogena nga importante nga balido ang impormasyon aron malikayan ang fake news.
Gilauman ni Ogena nga ang maong panagtapok makatabang sa pagpalig-on sa grupo sa mga information officers sa rehiyon.
Samtang gitambagan ni Assistant Secretary for Cultural Affairs and International Engagement Rowena Hidalgo Otida ang mga information officers nga magbantay sa tulo ka matang sa fake news nga mao ang sayop nga impormasyon, disinformation ug malinformation.
Gihatagan og gibug-aton ni Otida nga ang mga BIOs dunay importante nga papel sa pagbatok sa fake news ug pagpalambo sa media literacy sa ilang mga komunidad. (Edgar E. Fuerzas)
