Lalaki nga giingong nangawat og pahumot sa usa ka convenience store sa Governor Roa Street, Barangay Capitol Site, Dakbayan sa Sugbo gidakop sa guwardya sa maong establisemento, Martes, alas 5 sa buntag, Hulyo 2, 2024.
Ang suspek giila sa alyas nga si Iggy, 23, taga Sitio San Roque, Brgy. Capitol Site.
Matod sa guwardya sa 7-Eleven nga si Carlos Tudara Jr., 41, nga iyang nabantayan ang suspek nga namili og mga pahumot ug body spray.
Apan inay mobayad sa cashier giingong midiretso kini og gawas dala ang iyang gikuha nga mga pahumot sama sa AXE Body Spray nga mo balor og P274 ug Cucumber Melon Body Spray nga mokantidad og P249 busa dali niya ni nga gigukod.
Wala gyud kini mopatuo hinungdan nga iya ning gilayog ug nag-inilugay sila sa gikuha niini nga pahumot.
“Nituyok siya kaduha nya nikuha dayon siya atong mga pahumot. Pag-abot niya sa pultahan nagtawag-tawag pa na sa iyang cellphone.” asoy ni Tudara.
Rason sa suspek nga wala na siya nibayad ngadto sa cashier kay taas ang linya sa mga kustomer. / AYB
