Kampanya moalegre sa 3 Duterte

GIDAYEG ni Senador Ronald “Bato” Dela Rosa ang pagdagan sa tulo ka mga Duterte sa Senado aron nga di na siya mingaw ug si Senador Christopher “Bong” Go atol sa kampanya sa taliabot nga eleksiyon.

Gikanayon ni Dela Rosa ang iyang pahayag atol sa paghinabi kaniya sa mga tigbalita niadtong Biyernes sa hapon, Hunyo 28, 2024, sa Annex Event Center, SM City Davao. Gani nakugang pa siya human masayri bahin sa intensiyon ni kanhi President Rodrigo Duterte ug iyang mga anak nga si Paolo ug Sebastian nga magpapili alang sa senatorial position.

“I was caught unaware, because nakuratan ko but then happy because I was expecting a very lonely campaign for me and Senator Bong Go,” tataw pa niya.

Nagtuo ang senador nga kung naa sa kiliran ang mga Duterte, si Go ug siya di na mogamit og “guerrilla tactics” sa taliabot nga senatorial campaign.

“Dalawa lang kami mangangampanya, guerilla tactics, we know the administration, the opposition, nasa gitna pa kami,” matud niya.

Gihisgutan sab ni Dela Rosa nga ang pagkalakip sa mga Duterte ug ni Philip Salvador sa bugnong lugaynon sa Senado, dunay unom ka mga kandidato, maghimo sa kampanya nga mabulokon.

Sa dihang gipangutana kung modagan sab sa sunod nga eleksiyon, kompiyansa niyang gitubag nga modagan siya.

Kahinumdoman nga si Vice President Sara Duterte nagpahibawo niadtong Hunyo 25, 2024 nga ang tulo ka mga Duterte modagan alang sa senatorial position; iyang gikompirma ang pagsalmot nila sa sunod nga eleksiyon sa 2025.

Matud ni Sara nga si Sebastian, manghod niyang igsuon, modagan sa pagka-presidente 2028 national and local elections. Iya sab nga gibutyag nga iyang inahan Elizabeth Zimmerman buot siyang pabalikon sa Davao City ug hulipan si Sebastian isip mayor.

Sa pagkakaron, si Paolo Duterte mao ang Davao First District representative, samtang si Sebastian mao ang Davao City mayor. (Uban sa taho ni Third Anne Peralta-Malonzo)