NAKUMPISKA sa kapulisan sa Sta. Ana Police Station ang mokantidad sa P357,000 nga gituohang shabu nga gisulod sa usa ka parcel gikan sa Metro Manila padung sa Davao City.
Kini ang gibutyag ni Police Captain Rizalito Clapiz III, officer-in-charge (OIC) station commander sa Sta. Ana PNP, human sa ilang malampuson nga buy-bust operation batok sa usa ka babaye nga nailhang si alyas “Kabayo”.
Ang operasyon natigayon alas 12:57 sa gabii niadtong Huwebes, Hunyo 27, 2024, sa Purok Alicia Pelayo, Jerome, Barangay Centro, Agdao, Davao City.
Kauban sa Sta. Ana PNP ang Davao City Drug Enforcement Unit (CDEU) sa operasyon diin malampuson nga nadakpan ang suspek nga si Jacqueline, 31-anyos, residente sa maong lugar kinsa nailhang alyas “Kabayo” sa mga piniriso nga nadakpan sab sa buy-bust.
Moihap sa baynte ka mga pakite sa gituohang shabu nga motimbang sa 52.2 gramos ang nakuha gikan sa posisyon sa dinakpan.
Sumala ni Captain Clapiz III nga nakurat sila sa kadaghan sa shabu nga gihuptan sa suspek, nga giingon niining may mga tag-iya na ug igo na lang siyang mo-deliver niini, diin mao ang pinadala pinaagi sa parcel gikan sa Manila.
Dugang sa opisyal nga gibutyag sa suspek nga usa ka alyas Quimod, nga piniriso sa Davao Penal Colony (Dapecol), ang iyang amo ug maoy gasugo kaniya, pinaagi sa tawag sa cellphone kung asa ipangtagtag o i-deliver ang mga shabu.
“Gi-parcel na nila ang shabu, according sa atong suspect, gikan kini sa Manila, tapos siya na ang motagtag ani sa iyang mga parokyano, lsa sugo pud aning certain alyas Quimod, ug gani pagkadakop nato sa suspek nagsige pa og tawag sa iyang cellphone si alyas Quimod ug nabasa sab nato ang mga mensahe niini ug sa ubang mga parokyano o customer,” ingon ni Capt. Clapiz III sa SuperBalita Davao.
Sa kasamtangan, ang suspek gibalhog na sa selda sa Sta. Ana police samtang mihimo pa og lawom nga imbestigasyon ang kapulisan labot sa transaksiyon. (Jeepy P. Compio)
