2 ka suspek sa pagpatay nasikop atol sa manhunt

Duha ka suspetsado sa pagpatay sa 66 anyos nga lalaki sa Barangay Calangcang, lungsod sa Badian, ang nadakpan atol sa gilusad nga manhunt sa kapulisan, alas 5:00 sa Dominggo, Hunyo 30, 2024, sa dakbayan sa Mandaue.

Niadtong Hunyo 28, 2024, ang duha ka mga suspetsado nga nagpangidaron og 18 ug 24 pulos, matod pa, hubog nga sakay sa ilang motorsiko apan pag-abot sa Calangcang ilang nabanggaan ang usa ka kanding.

Tungod sa kasuko sa duha ka mga suspetsado kay na guba ang ilang motorsiklo, ilang gipangayoan sa damage ang tag-iya niini.

Ang anak sa biktima niinsister nga didto na lang sa barangay nila i-settle ang maong hitabo.

Apan pagka alas 7:30 sa gabii, ang duha ka mga suspetsado mibalik sa balay sa biktima dili sa pagresulbar sa isyu kon dili mibunot kini sa armas ug gipusil ang 66 anyos nga biktima.

Dali nga misibat ang mga suspetsado samtang dali usab nga gidala ang biktima sa tambalanan apan gideklarar kini nga dead on arrival sa Badian District Hospital.

Tungod niini, gilusad sa Badian Police Station ang manhunt operation sa pagpangulo sa hepe niini nga si Police Captain Jerwin Mark Battung ug pagka Sabado sa gabii, nakadawat sila og impormasyon nga naa kini sa dakbayan sa Mandaue.

Nakig-alayon sila sa Station 3 sa Mandaue City Police Office ug ilang malampuson nga naposasan ang mga suspetsado ug nakuhaan pa og armas.

Kasamtangan nga naa sa custodial facility sa Badian Police Station ang mga suspetsado ug mag-atubang kinig kasong murder ug kala­pasan sa Comprehensive Firearms and Ammunition Regulation Act. / AYB