Natulog gipusil, patay

Patay dihadiha human wala na makamata ang usa ka ulitawo nga natulog sa gawas sa usa ka tindahan sa Purok Centro sa Sityo Kawayanan, Barangay Lagtang, siyudad sa Talisay dihang gipusil sa ulo, alas 11 sa gabii, Miyerkules, Hunyo 26, 2024.

Ang biktima mao si alyas Eboy, 28, ulitawo, ug molupyo sa naasoy nga dapit.

Sa follow-up sa Superbalita Cebu, nasuta nga ang biktima naghigdaan sa gawas nga bahin sa usa ka tindahan sa maong dapit.

Ug nakurat ang mga lumolupyo sa dapit tungod sa sipa nga buto sa armas ug nakit-an ang usa ka wa mailhing tawo nga daling nisibat nga nagla­kaw padulong sa sapa.

Apan ang biktima wa na madala sa tambalanan human nakabsan kini dihadiha sa kinabuhi tungod sa grabeng samad sa ulo ug gipro­seso usab dayon ang dapit sa krimen sa PNP Scene of the Crime Operation (Soco) team.

Ang kapulisan sa Talisay ubos sa kamandoan ni P/Lt. Col. Epream Paguyod nagpa­dayon sa pag-imbestigar sa kaso ug nag-background check sa biktima atol ning pagsuwat. / DVG