Giabsuwelto sa korte sa dakbayan sa Muntinlupa si kanhi senador Leila de Lima sa ikatulo ug katapusan niyang kaso nga may kalabutan sa giingong pagkalambigit niini sa pagkuyanap sa ilegal nga drugas sa nasod.
Sa usa ka kamandoan nga gipagawas kaniadtong Lunes, Hunyo 24, 2024, ang Muntinlupa Regional Trial Court Branch 206 nitugot sa motion for demurrer to evidence ni De Lima, nga otomatikong nagbasura sa iyang katapusang nahibiling kaso sa drugas.
Ang abogado ni De Lima nisang-at sa petition for demurrer niadtong Marso, niingon nga ang prosekusyon napakyas sa pagpresentar og igo ug lig-on nga ebidensiya nga makasustenir sa usa ka hukom sa kombiksyon nga walay resonable nga pagduha-duha ngadto sa mga akusado.
Ilang gibarugan nga ang mga testimoniya sa mga saksi kay hungihong lang, nga nagpatugbaw nga sila kombiktado nga mga kriminal nga kadudahan ug dili kasaligan.
Ang duha ka mga saksi mao sila si Rodolfo Magleo ug Nonilo Arile, kinsa parehong ningbakwi sa ilang mga testimoniya batok kang De Lima.
Una nang giakusahan ni Magleo si De Lima nga nakabenepisyo sa operasyon sa ilegal nga drugas sa mga big-time drug lords sa New Bilibid Prison atol sa iyang termino isip secretary sa Department of Justice.
Matod ni Arile nga ang maong pundo gituyo aron pundohan ang kandidatura ni De Lima sa pagkasenador sa 2016.
Tulo ka mga kasong may kalambigitan sa drugas ang gipasaka batok kang De Lima atol sa administrasyon ni kanhi Presidente Rodrigo Duterte.
Kini nga mga sumbong nahitabo taliwala sa kusog nga pagsaway ni De Lima batok sa war on drugs ni Duterte.
Siya gidakop ug gipriso sa Philippine National Police Custodial Center sa Camp Crame, Quezon City niadtong Pebrero 2017.
Ang laing duha ka mga kaso sa drugas batok kang De Lima gibasura niadtong Pebrero 2021 ug Mayo 2023 human sa sunodsunod nga pagbakwi sa mga testigo, nga naglakip kang self-confessed drug lord Kerwin Espinosa.
Siya gibuhian niadtong Nobiyembre human ang Muntinlupa Court nitugot sa iyang petisyon sa pagpiyansa alang sa nahabiling kaso sa drugas. / TPM
