Patay nang nidangat sa tambalanan ang pahenante ug grabe ang drayber sa usa ka wing van nga nahulog sa pangpang nga may gilawmon nga 30 metros sa Barangay Yupisan, lungsod sa Pamplona, Negros Oriental, pasado alas 6 sa buntag, Dominggo, Hunyo 23 , 2024.
Ang namatay nga pahinante giila lang nga usa ka “Larry” ug ang drayber nga grabing naangol human maipit ug naluwas, gihulagway lang sa kapulisan nga usa ka hamtong na ang panuigon, minyo, ug taga lungsod sa Hinobaan, Negros Oriental.
Sa pasiunang imbestigasyon ni P/Master Sgt. Rengie Fernandez, traffic police investigator sa Pamplona Municipal Police Station, nasuta sa Superbalita Cebu nga ang maong wing van nagsubay sa dulhugon nga dapit ug pag-abot sa kurbadahon nga bahin, gituohan nga sa kabug-at sa mga bloke sa mga ice nga karga, nawad-an kini sa brake ug unang nidasmag sa railing ug didto na nahulog sa pangpang.
Ang mga rescuer sa Pamplona daling nitabang sa mga biktima apan, ang pahenante gidekarar nga dead on arrival (DOA) sa ospital. / DVG
