Ex-con gipusil-patay sa riding in tandem

USA ka lalaki’ng nagbarog daplin sa karsada gipusil-patay sa riding in tandem alas 12 sa udto sa Martes, Hunyo 18, 2024, sa Purok Tambis, New River­side, Barangay Umapad, Dakbayan sa Mandaue.

Ang biktima nga usa ka kanhi binilanggo sa kaso sa gidiling drugas, giila nga si Marlon Muaña Lañuza, 30, ulitawo apan may kapuyo, taga Purok Tambis, New Riverside.

Sa pasiunang imbestigas­yon sa kapulisan sa Mandaue City Police Station 5 ubos sa ilang hepe nga si P/Maj. Manuel Cabanlit, nasuta nga ang biktima nagbarog sa daplin sa dalan duol sa junk shop diin siya maoy caretaker.

Kalit nga nahiabot ang usa ka motorsiklo nga gisakyan sa duha ka mga tawo ug nihunong sa tungod sa biktima.

Ang angkas nini nikanaug ug gipusil ang biktima sa makadaghang mga higayon.

Ang duha ka wa mailhing mga lalaki daling nisibat sakay sa motorsiklo sa wala matino nga direksiyon.

Ang biktima gidali sa pagtabang ug gidala sa Maayo Hospital sa Barangay Alang-alang, Mandaue City apan gideklarar nga dead on arrival (DOA) sa attending physician nga si Dr. Leo Ong.

Ang kapulisan nilusad sa Oplan Universe dragnet aron sa pagsikop unta sa mga mamumuno.

Nasayran nga ang biktima gipasakaan og kasong pagpayuhot sa illegal drugs sa Mandaue City Police Station 5 niadtong Abril 17, 2019, apan nisulod sa plea bargain hinungdan nga nakagawas sa bilanggoan.

Usa sa gitutokan nga motibo sa pagpatay mao ang iyang ka­lambigitan sa ilegal drugas. (DVG)