HUSTISYA ang singgit sa pamilya sa babaye nga ngilngig nga gipatay alas 2 p.m., Lunes, Hunyo 17, 2024, sa Kidapawan City.
Giila ang biktima nga si Sharon Rose Onggona Lapis, 45-anyos, minyo, ug nagpuyo sa Sitio Anitap, Barangay Ilomavis, Kidapawan City.
Gitudlo nga suspek mao si Julie Solilom nga silingan lang sa biktima.
Matud ni Nerissa Onggona Failano nga nagkalalis ang iyang igsuon ug ang suspek kabahin sa bingkil sa yuta nga ilang giugmad.
Tungod sa kasuko ni Solilom, nikuha kini og kutsilyo ug gidunggab sa makadaghang higayon si Lapis.
Wala pa matagbaw ang suspek iya pa nga gigulgol ang liog sa biktima.
Miikyas sab dayon ang bayaw sa biktima sakay sa motorsiklo.
Nakaangkon og 17 ka samad dinunggaban ang biktima sa nagkadaiyang parte sa lawas nga maoy hinungdan sa iyang kamatayon.
Padayon pa nga gipangita ang suspek sa kapulisan sa Kidapawan City Police Station samtang gitakda nga pasakaan og kasong pagpatay. (EEF)
