P7M balor sa shabu nasakmit sa buy-bust sa Brgy. Tejero

Usa ka babaye nga giila sa kapulisan nga high value individual (HVI) nasakmitan og 1,030 gramos sa gituhoang shabu nga moba­lor og P7,004,000 atol sa buy-bust sa Sityo Front Blessed, Brgy. Tejero, siyudad sa Sugbo alas 2:45 sa kaadlawon sa Lunes, Hunyo 17, 2024.

Nasikop mao si alyas Da­ling, 45, minyo, taga Brgy. Calamba, siyudad sa Sugbo. Ang kapulisan nagdumili sa paghatag og ngan sa supek subay sa polisiya nga ilang gisunod.

Nangulo sa operasyon mao ang Drug Enforcement Unit sa Waterfront Police Station ubos sa ilang bag-ong hepe nga si P/Maj. John Lymbert C. Yango ug koordinasyon sa Philippine Drug Enforcement Agency (PDEA 7).

Gidala ang gidudahan nga shabu sa Regional Forensic Unit 7 sa Cebu City alang sa chemical analysis.

Samtang ang suspek nabalhug na sa selda sa Police Station 3 sa Cebu City Police Office (CCPO).

Si Daling gihulagway sa kapulisan nga usa sa mga “Tres Marias” sa gidiling drugas sa dan A. Lopez, Barangay Calamba, Siyudad sa Sugbo.

Ang suspek nadakpan na sa 2019 sa kaso gihapon batok sa gidiling drugas ug nakagawas niadtong Hulyo 2022 kay nakapiyansa apan pending pa ang maong kaso sa Regional Trial Court (RTC) Branch 21 sa Siyudad sa Sugbo.

Si Daling giingon ngga makahalin og tulo ka kilo sa shabu kada duha ka semana gikan sa iyang tinubdan nga nag-angga og “Pidoy” nga nabilanggo sa Leyte Regional Prison sa Abuyog, Leyte.

Sa pagkakaron, giandam na sa kapulisan ang tukmang kaso nga ipasaka batok kaniya. / DVG