Gikatakda’ng adunay away ang usa sa mga garbo sa Sugbo nga si KJ Cataraja, kinsa undefeated pa sa iyang 17 ka professional fights, karong buwan sa Agusto.
Ang kanhi sakop sa nasira na nga ALA Boxing Gym atoa na karon sa Japan aron ipadayon ang iyang boxing career nga maoy iyang nahimo’ng tinubdan sa ilang kapanginabuhian.
Kabos ang pamilyang Cataraja, kansang kaliwat natisok sa lungsod sa Tabuelan, probinsiya sa Sugbo.
Gani ang boxing maoy nahimo niyang giya aron makahuman sa iyang pag-eskuwela sa kursong Criminology.
Sama sa ubang mga boksidor, damgo ni Kevin Jake nga mamahimo’ng world champion sa umaabot nga adlaw. Wa pa man tuod mahitsas ang mga papeles sa iyang nagsingabot nga away, apan padayon ang iyang subsub nga ensayo.
Importante niya kining awaya kay posibling mao kini ang magyawe sa iyang mga pangandoy. Pero taliwala sa iyang pagpangandam daw og sa gihamok si Cataraja og problema nga nakadisturbo sa iyang preparasyon. Ang nahitabo mao nga niadtong Biyernes sa buntag nadisgrasya ang iyang igsuong lalaki diha sa may Cabancalan sa Talamban, Cebu City.
Nadasmagan ang motor nga gisakyan sa iyang manghod sa usa ka van. Dako-dako ang kadaot kay duna may fractured ang bukton niini.
Wala na makatrabaho ang iyang manghod pero ang pinakabati nga ilang nasinati kay ang nakadasmag, daw og sa dili mobayad sa ilang responsabilidad. Kompleto sila sa papeles, dunay police blotter ug uban pa. Hinuon aduna silay mga detalyi sa mga nakadasmag.
Kusganon nga miinster ang driver sa van nga sayop kuno sa manghod ni Cataraja ang maong disgrasya, pero sa sketch nga akong nakita, mora man og diha magsubay ang motorsiklo sa bike lane sa kalsada. Duna nay imbestigasyon sa kapulisan. Matod ni Kevin Jake nga niadto man tuod sa ospital ang driver ug mipasalig nga motabang sa gastuhan. Gibinlan pa sila og P1,000.
Pero wala na mobalik ug dili na sab motubag kon tawagan sa cellphone, dugang ni Cataraja. Iyang gi-message ang igsuon sa driver nga maoy tag-iya sa van. Dugay naka reply, pero sa pag reply, grabi nang pamalibad niini nga wala kuno silay tulobagon kay sala sa igsuon ni Cataraja.
Naglabad ang ulo ni Cataraja karon, ilabi na kay tua ra siya sa Japan ug dili siya makalihok kalabot niini.
Hangtod karon, way kinatulgan nga nagsigi og huna-huna si Kevin Jake niini. Dako kining disturbo sa iyang pagpangandam alang sa iyang away. Nanghinaot si Kevin Jake nga duna untay makatabang niya niini samtang atoa siya sa Japan.
Bitaw sab. Dili lalim nga atoa ka sa layo’ng dapit unya sungogon ka sa problema sa pamilya nga ania dinhi.
Sa habig sa driver, nganong dili man sab sila mohatag og ayuda nga ila man gyud nang responsibilidad bisan kinsang sayop?
