Wa pay niila sa usa ka lalaki nga gituohan nga gi-salvage ug gilabay sa sapa sa Sityo Kaduldulan, Brgy. Mangga, lungsod sa Tuburan, tunga-tungang kasadpang Sugbo.
Ang lawas nadiskubrehan alas 5:30 sa hapon sa Huwebes, Hunyo 6, 2024, butyag ni P/Staff Sgt. Euwen Pitogo sa Tuburan police sa interbyo sa sibyaanang dyLA sa Sabado, Hunyo 8, 2024.
Matod pa niya nga ni-post sila sa ilang Facebook page sa Tuburan ug giklaro ang mga tattoo sa biktima.
Sila nanawagan sa mga tagÂtungod o pamilya ug kaila sa biktima apan way ni-response sa comments nga nakaila.
Si Pitogo nagduda nga di taga Tuburan ang biktima.
Ang nakakaplag sa lawas mao si Mangga brgy. councilor Jandere Flores, kinsa ni-report sa kapulisan sa Tuburan mahitungod sa napalgang lawas nga naglutaw sa sapa.
Dali kini nga girespundihan nila ni Police Executive Master Sgt. Licayan ug P/SSgt. Euwen Pitogo ug mga kauban.
Ilang gihulagway ang biktima nga nag black long sleeve, mga tiil giputos og itom nga black plastic garbage bag ug gigapos sa packaging type.
Ang ulo giputos og black plastic garbage bag ug may cotton blanket, way samad nga nakit-an.
Ang biktima gidala sa Tuburan District Hospital ug gihulagway sa attending physician nga si Dr. Ridzhar Timhar nga ang biktima sobra 24 oras nang patay dihang nakaplagan.
Ang lawas naa sa Saint Peter Funeral Homes.
