Sa sunod buwan, ang 2024 Palarong Pambansa moabli na sa dakbayan sa Sugbo isip host apan, ang iyang budget nga P405 milyunes gikunhoran sa P262 milyunes o gikibhangan og P148 milyunes ni Acting Cebu City Mayor Raymond Alvin Garcia niadtong Lunes, Mayo 3, 2024.
Kapin sa katunga ang naus-os sa budget human sa pagsusi ni Garcia nga nilingkod isip acting mayor niadtong Mayo 10, 2024 human gipaubos si Mayor Michael Rama sa preventive suspension sa Ombudsman sulod sa unom ka mga buwan.
Matod ni Garcia, atol sa ‘Beyond The Headlines’ online commentary program sa SunStar Cebu sa Martes, Hunyo 4, 2024, ang P262 milyunes ‘maximum’ nga magasto ug posible nga dili pa kini mahurot.
Unsa ang unang napasar sa Konseho nga P405 milyunes nga budget, gipaburot? Wa kaha masiksik sa Konseho ang mga detalye niini? May igong pundo ba kaha sa maong budget?
Busa blessing in disguise ang paglingkod ni Garcia isip acting mayor human nasiksik ang budget ug nakunhoran kini pinaagi sa pag-ila sa mga prayoridad sa pagpamalit ug ubang mga galastuhan.
Sa laktod nga pagkasulti, ang dakbayan nakadaginot human mitikuluso nga gisusi ni Garcia ang budget sa Palarong Pambansa ug matod niya, gikonsiderar gihapon ang kalidad sa pag-host sa labing dakong paugnat-sa-kusog sa nasod.
Matod pa, dunay ubang mga detalye sa unang budget nga pwede nga madaginot ug di na kinahanglan nga buraska o bongga nga kalihukan.
Pastilan kon wala pa malili ni Garcia, dako gyud og magasto ang dakbayan. Daghan nang nagduda sa kwestiyonable nga kadako sa unang budget. Basin dunay mahulog sa personal nga bulsa?
Nakorehian na. Moabante na kita sa paspas nga pagpangandam alang sa kalampusan sa 2024 Palarong Pambansa sa Sugbo.
Maayong suportahan nato ang pagpangandam ug pagpahigayon sa umaabot nga kalihukan human nakasandig ang dungog niini kanatong mga Sugboanon — magmalampuson man o dunay bulilyaso.
