“KINI ba ang atong ibilin sa atong mga kabatan-onan?”
Mao kini ang pangutana ni Caritas Philippines President ug Diocese of Kidapawan Bishop Jose Colin Bagaforo, D.D. sa pagduso ngadto sa Senado sa House Bill No. 9349 o Absolute Divorce Bill human maaprobahan sa ubos balay balauranan o Kongreso.
Matud pa sa obispo, nakita na ang epekto sa divorce sa ubang nasud nga nipatuman niini ug dili siya makaingon nga nakatabang kini.
Dugang pa ni Bagaforo nga kini nga western ideology nga gipasiugda tungod sa wala pagkasinabtanay ug sayop nga edukasyon.
Gitin-aw niya nga mas maguba lang ang kaugmaon sa mga batan-on nga maapektuhan pag-ayo sa balaod. Kini nga mga batan-on maoy mahimong sunod nga mga lider ug mga magbalantay sa nasud.
Ang Pilipinas usa sa duha ka nasud sa kalibutan nga wala pa mahimong legal ang diborsiyo. Ang ikaduha mao ang Vatican City.
Samtang gibarugan sab ni Fr. Benjamin Torreto, DCC, rector sa Immaculate Conception Cathedral sa Cotabato City, nga adunay daghan pa nga buhaton sa pagpalig-on sa relasyon ug pundasyon sa mga magtiayon sa dili pa kini mosangpot sa diborsiyo.
Gisulti ni Torreto nga ang kaminyuon usa ka Sakramento ug panalangin gikan sa Ginoo diin ang magtiayon misaad nga kamatayon lamang ang makabulag kanila.
Matud niya nga mao kini ang angay nga barugan sa mga Katoliko ug dili ang diborsiyo maoy tubag sa mga hagit nga giatubang sa magtiayon.
Giangkon ni Torreto nga kuwang ang simbahan sa mga programa nga nakasentro sa pagpalig-on sa kinabuhing minyo ug mao kini ang ilang gipaningkamotan nga matubag.
Sumala pa nga walay konsultasyon ang mga magbabalaod gikan sa Bangsamoro Autonomous Region in Muslim Mindanao (Barmm) nga nipabor sa Divorce Bill aron madungog unta ang simbahan sa dili pa mohimo og desisyon.
Nanawagan usab ang obispo ngadto sa mga Katoliko nga moapil sa mga himuong kalihukan sa simbahan aron supakon sa hingpit ang pagsagop sa diborsiyo sa nasud.
