Ex-convict gipatay

Usa ka ex-convict sa kasong murder ang gibanhigan-­pa­tay sa Sityo Tubod, Bara­ngay Langkas nga usa ka bu­kirang dapit sa lungsod sa Dalaguete, habagatan sa Sugbo, alas 10:35 sa buntag, Dominggo, Hunyo 2, 2024.

Ang biktima giila nga si Brian Carale Dela Peña alyas Ian, 39, ulitawo, mag-uuma ug taga Brgy. Langkas, Dalaguete, kinsa kanhi nabilanggo sa kasong pagpatay ug dunay ubang kaso nga nag-ung-ong sa korte.

Samtang, ang mga mamumuno duha ka mga wa mailhing lalaki nga nagkasay sa usa ka motorsiklo nga armado og .45 nga kalibre sa pistola.

Sa imbestigasyon ni P/Staff Sgt. Rex Pe­lonio, investigator on case sa Dalaguete Mu­nicipal Police Sta­tion, ubos sa kaman­duan sa ilang hepe nga si P/Maj. Vincent Zozobrado, nasayran ang biktima dunay angkas nga laing lalaki apan wala kini giapil sa pagpusil.

Matod sa angkas nga barkada sa bikti­ma, gikan sila sa Ba­rangay Mantalongon, Dalaguete ug nag­padulong sa pagpauli sa Langkas diin ang biktima maoy nagmaniho sa motorsiklo. Apan, dason sa barka­da, pag-abot sa Sityo Tubod sa Langkas, kalit lang silang gibabagan sa laing motorsiklo ug ang angkas niini maoy nipusil sa biktima tumong sa agtang.

Ang riding in tandem nga mamumuno daling nisibat pa­dulong sa wa matino nga dapit sa habagatang direksiyon.

Ang biktima gisuwayan sa pagtabang ug gidala sa Bogo Argao District Hospital ICKMH apan gidekrarar sa attending physician nga dead on arrival (DOA). Gisubay pa karon sa kapu­lisan sa Dalaguete ang motibo sa kaso nga posibling panimalos tungod sa daghang kaso nga giatubang niini. / DVG