Sa pagbalik sa mga reklamo sa “unauthorized collection” sa mga bayronon sa parking gawas sa gitakdang adlaw ug oras sa dakbayan sa Sugbo, usa ka opisyal sa city hall nanawagan og lawom nga imbestigasyon aron matubag ang problema.
Si Cebu City Councilor Jun Alcover, sa iyang privilege speech atol sa regular session sa Konseho niadtong Mayo 29, 2024, nipalabang og resolusyon nga nagmando sa mga representante gikan sa Cebu Parking Management (CEPMA), Traffic Management and Coordination Committee (TMCC), Cebu City Transportation Office (CCTO) ug City Legal Office (CLO) sa pagtambong sa usa ka executive session agi’g tabang sa legislative intervention, nga gikasabutan nga ipahigayon sa Hunyo 19, 2024.
Si Alcover niingon nga ang iyang buhatan nakadawat na og duha ka mga reklamo gikan sa kinatibuk-ang publiko niadtong Marso 13, nga iyang gibase sa report sa SunStar Cebu, ug bag-ohay lang niadtong Mayo 19.
Ang reklamo bahin sa pipila ka mga personnel sa CEPMA nga nangolekta og parking fee nga P20 matag Dominggo.
“Last Saturday ug Sunday dunay niabot sa opisina nga nanawag nato nga gikolektahan sila. In fact ako sila giingnan nga i-provide ko og ebidensya, katong mga ticket nga ilahang gihatag,” matod ni Alcover.
Base sa City Ordinance 1293 of 1998, si Alcover niingon nga ang CEPMA makakolekta lang og parking fee gikan sa Lunes hangtod Sabado, gikan sa alas 7:00 sa buntag hangtod sa alas 7:00 sa gabii.
Giila usab sa ordinansa ang kadalanan diin ang bahin niini gitudlo nga pay parking area sa dakbayan.
Ang CEPMA usa ka pribadong service provider nga adunay joint venture agreement sa Kagamhanan sa Dakbayan sa Sugbo sa pagdumala sa mga parking zones sa dakbayan lakip na ang pagpangolekta sa parking fees.
Ang CEPMA gipanag-iya ug gipadagan usab sa Tokagawa Global Corporation.
Siya nidugang nga ang TMCC nagsugod na og imbestigar karong bag-o kalabot sa giingong kalapasan sa CEPMA, apan wala siya makadungog og updated nga report sa maong inquiry.
“Naa ba sila’y rekomendasyon alang niini? Ug unsa man ang gibuhat sa CEPMA aron malikayan kining mga alegasyon batok kanila?,” matod ni Alcover.
Gikuwestiyon ni Alcover ang TMCC kon nganong wala niini ipatuman ang pipila ka mga probisyon sa Ordinance 1293 diin aduna kini supervisory function sa mga personnel nga nagdumala sa pay parking zones sa dakbayan.
Matod niya nga ang padayong operasyon sa mga pay parking zones sa dakbayan nagpakita sa paspas nga pag-uswag sa pagpanag-iya sa mga sakyanan dinhi sa siyudad, busa kinahanglang palig-unon sa kagamhanan sa siyudad ang ilang koordinasyon sa parking management entity.
Atol sa samang sesyon, si Konsehal Franklin Ong niingon nga ang pagmugna og “oversight committee” sa mga personahe sa parking management zone sa dakbayan gihuna-huna na.
Si Ong niingon nga kini nunot sa usa ka resolusyon, nga iyang giduso ug gipasar atol sa special meeting nga gipahigayon sa TMCC uban sa CEPMA niadtong Mayo 23. / EHP
