2 ka ‘kawatan’ nasikop kay wa kabantay sa tag-iya

Duha ka giingong ilado nga mga kawatan nasikop human sila giingong wa nakabantay nga nakit-an sa ilang biktima nga senior citizen pasado alas 5 sa hapon sa Biyernes, Mayo 24, 2024 sa SRP road, Brgy San Isidro, Siyudad sa Talisay.

Ang mga suspek nga nabilanggo na sa Talisay City Police Station giila nga sila si Mateo Tapdasan Aracap Jr., 23, ulitawo, taga Caktos, Brgy. Inayawan, sa Siyudad sa Sugbo, apan nagpuyo na sa Brgy. Cansojong, Talisay, ug si Jeffrey Cuico Martin, 31, ulitawo, lumad nga taga Brgy. Pakigne, Minglanilla apan nagpuyo na sa dapit.

Ang biktima giila nga si Jerome Lao Co, 64, ulitawo, taga San Isidro St., Brgy. San Isidro, Talisay. Matod sa Talisay police nga nanawag og polis si Co pinaagi sa telepuno gumikan kay gisud og mga tulisan ang iyang tugkaran.

Dali nga niresponde ang kapulisan sa Siyudad sa Talisay ubos sa kamanduan sa ilang hepe nga si P/Lt. Col. Epream Paguyod ug ilang naaktuhan ang mga suspek nga nanguha sa mga butang nga tanan nibalor og P30,050.

Ang duha gihulagway nga banggiitan nga mga kawatan sa dapit busa gibantayan na ang ilang mga lihok, matod sa kapulisan. Tukmang kaso ipasaka sa kapulisan batok sa mga suspek. / DVG