Mag-ilis unta og wire sa kuryente ang usa ka barangay kagawad hinungdan nga siya nisaka sa poste. Apan nakuryentihan hinuon siya ug namatay sa Purok 3, Barangay Siocon, Compostela, lalawigan sa Davao de Oro alas 6:20 sa gabii sa Mayo 22, 2024.
Kini maoy nigawas sa imbestigasyon sa Compostela Municipal Police Station nga niila sa biktima nga si Adriano Bigonte Potane, 60, minyo, giingong accredited electrician, taga Purok 7, Barangay Siocon, Compostela.
Gibutyag nga usa ka Rolie Laborada Potane, 39, minyo, mag-uuma, lumolupyo sa Purok 7, Siocon nidangop Compostela MPS aron itaho ang kabahin sa insidente.
Niresponde ang mga polis ug giadto ang dapit aron susihon ang insidente.
![](https://xpresschronicle.com/wp-content/uploads/2024/01/WONDER-SPRAY-ADS2.png)
Base sa imbestigasyon, ang biktima nisaka sa poste sa Northern Davao Electric Cooperative, Inc. (NORDECO) aron ilisan ang polyethylene service drop wire nga nakakonektar sa panimalay ni Rovic Jean Galpo.
Apan ang biktima nakuryentihan dihang gikonektar niini ang nahisgutang wire sa secondary line nga 220 volts.
Giingong nakaangkon ang biktima og electric shock nga niresulta sa iyang kamatayon.
Lawas sa biktima gipahiluna na sa Alar Funeral Homes sa Purok 2, Brgy. Poblacion, Compostela. / Sunstar Davao