Maestro ‘hubog, nangulata’; nanghimakak kay siya biktima

Maestro nag-wild, giingong nangulata sa iyang kapuyo ug kabanay, nanghagit pa og duwelo sa kapulisan samtang nagmaoy sa kahubog, nasikop alas 12:40 sa kaadlawon sa Sabado, Mayo 18, 2024 sa Sitio Huyong-Huyong, Brgy. Mambaling, dakbayan sa Sugbo.

Si Cyril Jumao-as Abelgas, 45, taga Sitio Matab-ang, Brgy. Day-as, lungsod sa Cordova, magtutudlo sa senior high school, napriso sa Mambaling Police Station sa Cebu City Police Office (CCPO).

Si Major John Lynbert Yango, hepe sa Mambaling Police Station nga nahinabi sa Superbalita Cebu, niingon nga kasong alarm and scandal ilang ipasaka batok kang Abelgas sa Lunes, Mayo 20, 2024.

Matod ni Yango nga nag-wild ang maestro tungod sa kahubog, nanghagit pa og duweldo kanila nga ningtubag sa alarma.

Gisinggitan pa og bati nga mga pulong ang mga polis. Ang suspek gireklamo sa iyang kapuyo ug mga igsuon sa babaye.

Matod ni Yango nga mangatulog na unta sila si Abelgas ug iyang kapuyo dihang ang igsuon nga babaye sa kapuyo nihatag og habol.

Giingon nga nasuko si Abelgas, gitamparos ang nawong sa kapuyo sa makadaghan.

Ang mga igsuon sa kapuyo ug higala ning-uwang unta, apan nag-wild, nangataki kanila.

Giingon nga nitamay sa kapuyo si Abelgas, nisulti og bati ug malaw-ay. Giingon nga gihulga sab niya ang igsuon sa iyang kapuyo ug higala nga ipapatay sa higala nga hitman.

NANGHIMAKAK

Si Abelgas nga nahinabi sa Superbalita Cebu samtang gitanggong sa police station, nanghimakak sa pasangil.

Matod niya nga gibali ang estorya ka siya maoy biktima.

Siya ang gitabangan og kulata hinungdan nga siya nabun-og.

“Nagselos siya sa usa namo ka bisita sa vlog. Mao man na siya basta makainom, bisan kinsay selosan,” matod ni Abelgas.

Naghimo unta sila og content sa vlog kabahin sa usa ka pasaway nga anak. Apan dihang nahubog ang iyang kapuyo, kini nagselos apan dihang iyang gipasabot, nisamot og selos.

“Sa akong kalagot gisumbag na lang nako ang samin. Nasamad akong kamot,” asoy ni Abelgas.

Diha-diha giingon nga gitabangan siya og kulata.

“Nalipay ko nga naabot ang polis, pero wala sila naminaw sa akong habig.”

Siya nipasangil nga ang nangulata gihatagan og pagtagad.

Tungod niadto nasinta siya, nakalitok sa bati nga mga pulong batok sa mga polis.

“Mangayo kog pasaylo sa mga polis. Nakalitan ra ko ato. Nabun-og na man ko niadtong higayuna, gitabangag kulata unya akoy napriso,” dugang sa maestro. / GPL