Drug den nga nahimutang sa Sitio Lupa, Brgy. Kamputhaw, Dakbayan sa Sugbo gibungkag sa mga operatiba sa Philippine Drug Enforcement Agency (PDEA) Cebu Provincial Office inabagan sa Abellana Police Station sa Cebu City Police Office alas 4:50 sa Biyernes sa hapon Mayo 17, 2024.
Atol sa operation, nadakpan ang tulo ka mga tawo, apil na niini ang suspetsadong drug den maintainer nga giila nga si Jason Calanog, 34.
Lakip sa nadakpan isip drug den visitors giila nga sila si Victor Sultan, 39, chorizo maker, ug Jemedel Purisima,43, usa ka tattoo artist.
Nasakmit sa mga operatiba ang 12 ka pakete sa gituohang shabu nga motimbang og 15 gramos nga dunay estimated average market value nga P102,000, mga gagmay’ng putos nga dunay residue sa gituohang shabu, lakip na ang buy-bust money ug nagkadaiyang drug paraphernalia.
Matod ni Leia Alcantara, information officer sa PDEA 7, nga ilang nadawat ang kasayuran gikan sa usa sa mga lumolopyo sa lugar nga dunay drug den nga gipadagan ni Calanog.
Gipaubos dayon nila sa duha ka semana nga case build up ug sa dihang nakuha ang tanang impormasyon, nilusad sila sa operation.
Giingong maka dispose si Calanog og 50 ngadto sa 100 gramos nga shabu matag semana.
Ang mga nakuha nga ebedensya gi-turnover na sa ilang chemist alang sa chemical analysis ug gitakdang pasakaan og kaso nga kalapasan sa Section 5,6,7,11 ug 12 Article II sa Republic Act 9165 kun Comprehensive Dangerous Drugs Act of 2002 ang mga suspek. / AYB
