GIKALIPAY sa walo ka mga asosasyon sa mangga nga dili lang mga Cotabateño ang nalingaw sa gihimong pasundayag sa mga produkto sa mangga kon di lakip na ang mga silingang dapit atol 2nd Mango Harvest Festival.
Mga produkto sa mangga nagagikan sa nagkadaiyang lungsod sa Cotabato Province ilabi na gyud sa Pigcawayan, Midsayap, Aleosan, Pikit, Carmen, Matalam, M’lang ug Tulunan.
Base sa datus sa Office of the Provincial Agriculturist, sa unang adlaw sa kapistahan sa ani, mokabat sa 1,018 ka kilo nga presko nga mangga ang nabaligya sa mga mag-uuma nga misalmot sa aktibidad nga nakahatag kanila og kita nga P73,140.00.
Samtang ang namaligya og mga processed products sama sa puree, dried mango, juice ug uban pa nikita og kinatibuk-ang halin nga P10,325.00.
Ang kagamhanang probinsiyal sa Cotabato, ubos sa pagpangulo ni Governor Emmylou “Lala” Taliño-Mendoza, nagpasalamat sa tanang misuporta ug misalmot sa 2nd Mango Harvest Festival nga gipasiugdahan sa kapitolyo.
Padayon nga nanawagan ang gobenadora ngadto sa publiko nga mobisita sa The Basket and Pasalubong Center sa Capitol Grounds, Amas, Kidapawan City aron matilawan ang lamian ug tam-is nga mangga sa mga mag-uuma nga Cotabateño. (Edgar E. Fuerzas)
