Lakers management angay sab basulon

Sa tinamban nga termino, milagro na lay makasalbar sa Los Angeles Lakers nga nakasulod sa second round sa playoffs.

Subidahon pa sa Mount Apo ang ilang latason aron ilang mabuntog ang defending champion Denver Nuggets kinsa nakaposte na og 3-0 nga labaw sa ilang serye.

Sa kasaysayan sa NBA wala pay team nga nakabangon human mabiyai, 0-3, sa sayong arangkada, hinungdan nga daghan ang nakaingon nga milagro na lang ang makaluwas nila.

Unang maigo sa mga nega­tibong komento mao gilayon ang coach. Mao man gyud ni ilang papel. Kon modaog ang team ang player maoy maayo pero kon mapildi, ang coach dili kamao.

Tungod niini, magsugod na sab pagbukal ang posibilidad nga mataktak si Ham sa iyang puwesto sa dihang milanog ang panawagan atol sa Game 3 diin natataw na ang ilang kapildihan.

Kini dili halayo nga mahitabo kay kon atong lantawon ang kasaysayan sa Lakers kapila na sila mag-ilis ilis og coach sulod lang sa pipila ka season.

Pananglitan, si Mike Brown wa gani kaabot og usa ka tuig. Si Mike D’Antoni duha ka tuig, Si Byron Scott duha pud katuig. Luke Walton tulo ka tuig ug Frank Vogel tulo ka tuig. Karon si Ham na sab ang isunod.

Unya, gawas nila ni LeBron James ug Anthony Davis, halos kada tuig usab sila mag-bag-o og players. Dili kaha mao ni igong rason mohupas ang ilang birada sa playoffs? Di permi magkasinabot kay wa may igong kasinatian matag usa.

Sukwahi sa Denver. Ang headcoach nga si Michael Malone siyam na katuig sa Nuggets. Sa ato pa, ang iyang programa dunay continuity. Ang ilang mga players permamenti. Kon dunay kausaban minoriya ra. Maintain ang ilang chemistry.

So maka implement siya sa iyang gusto kay sa kinatibuk-an siya man ang gisaligan gyud sa management. Ang mga players atoa mag rely kaniya kay ang iya mang programa ang gisunod sa team.

Sa Lakers lisod ipatuman ang adjustment kay hanap man ang pagsinabtanay sa matag usa. Daghan ang mopapil sa decision kay ultimo ang management wa motingob sa ilang pagsalig ngadto sa usa ka tawo. Kulang sa implementasyon sa respeto ug disiplina.

Pananglitan. Si Angelo Russel kinsa pito ka higayon nga nasipyat sa iyang itsa, wa moapil sa huddle sa team atol sa timeout ug igo ra kini nga naglingkod.

Dili maayong tan-awon sa usa ka team ug naghatag lang kini og timaan nga wa gyud sila magkahiusa.

Pero mao ni style sa ilang bag-ong management, nga dakong sukwahi sa kaniadtong panahon nilang Kobe Bryant.

Taas sila og debosyon sa ilang mga star players pero mubo ra sila kaayo og pasensiya sa ilang coach. Wa ta kahibaw kon kinsang sistema ang ilang sagupon.

Mao ni rason nganong ang Lakers lupigon sa dinuwaay ug diskarte sa Nuggets, ug labaw pang wa pa gyud silay dag-anan sa coaching kay beterano man si Malone.

Hangtod way kausaban nga mahitabo sa pamaagi sa management, di ta makalaum nga mausab sab ang ilang sitwasyon. Pasensiya maoy usa sa mga yawe sa kalampusan. Mao ni ang nahitabo sa Nuggets.