Motorsiklo nasingkian sa trak; 2 nangaangol

Ride hailing app driver ug iyang pasahero nangaangol human sila nasaghiran sa usa ka mixer truck sa eskina sa mga Dan M.C. Briones ug H. Abellana sa Siyudad sa Mandaue alas 2:35 sa hapon, Abril 19, 2024.

Ang drayber sa motorsiklo giila nga si Jose Rey Allones Culanculan, 54, minyo, Move It Driver, taga Marigondon, Lapu-Lapu City samtang ang iyang pasahero giila nga si Christine Gold Aguilar, 35, dalaga, taga Sityo Luay, Brgy. Sapangdako, Siyudad sa Sugbo.

Sa pasiunang imbestigas­yon sa Mandaue Traffic Police ubos sa kamanduan sa ilang hepe nga si P/Maj. Manuel Rabaya, nasuta pa nga ang mga biktima nasaghiran sa mixer truck nga gimaniho ni Nestor P. Sabalande, Jr., 40 , minyo, taga Kanlahangan, Tabuelan.

Samtang nagtadlas sa karsada gikan sa Consolacion pa­dulong Pacific Mall, nasingkian ang motorsiklo sa trak.

Wa na nakakontrolar si Culanculan sa motorsiklo, nabangga siya sa passenger jitney nga gimaneho ni Ariel Aridondon, 48, minyo, taga Bagatayam, Sogod, amihanang Sugbo.

Mga biktima daling gidala sa Mandaue City District Hospital. / DVG