Editoryal: Di malikayan nga magduda

Gitinuod sa kapulisan, inabagan sa Philippine Drug Enforcement Agency (PDEA 7) ang pag-imbestigar sa pagransak sa armadong mga tawo nga pulos nagtaptap niadtong Abril 16, 2024 sa duha ka balay sa Brgy. Taloot, Argao, habagatang Sugbo.

Una nga girangsak ang kang Chula Mamolo Mamallas, kinsa mabdos, samtang sila nangatulog na uban sa iyang mga anak. Gidala ang ilang multicab ug duha ka mga motorsiklo.

Gidala pa siya sa armado nga mga tawo ug gisigehan og hapak ang ulo samtang gipatug-an hain ang shabu. Didto na siya nakaamgo nga naalaan siya tungod kay lehitimo silang negusyante sa iyang bana nga nagpautang og kwarta, nagpaluwagan ug naninda og karne.

Didto na siya gipakanaug sa Valladolid, Dakbayan sa Carcar.

Ikaduhang giransak mao ang ilaha ni Jovani Gecale Camillo, kinsang kapuyo naka probation sa kaso sa illegal drugs apan matod niya nagbag-o na. Nipasa­ngil si Camillo nga ang ilang P140,000 nga ilukat sa ila untang balay ug yuta nga giprenda nadala.

Tungod kay naghisgot og PDEA ang mao nga mga tawo, ang anti-drug agency nangunay sa pagsusi kay usa kini ka pagdaut sa ilang buha­tan. Tuod man, uban sa Argao Municipal Police Station, nasubay ang nahimutangan sa gadget. Nakuha sa kapulisan ang multicab ug usa ka motorsiklo nga ila ni Mamallas.

Hinaot pang di lang kutob sa pagbawi sa mga sakyanan ang mahimo sa mga otoridad, ila gyud nga ilhon kinsa kini nga grupo aron mapasakaan og kaso.

Kay bisan unsaon, di malikayan nga mag­duda ang publiko nga dunay mga polis ug ilang mga kaabag nga nalambigit niini.